կարևոր
1480 դիտում, 3 շաբաթ առաջ - 2021-09-26 14:42

ԱԺ «Հայաստան» խմբակցության ղեկավար Սեյրան Օհանյանի ուղերձը 44-օրյա պատերազմի տարելիցի կապակցությամբ. ՏԵՍԱՆՅՈՒԹ

ԱԺ «Հայաստան» խմբակցության ղեկավար, գեներալ-գնդապետ, Արցախի և Հայաստանի պաշտպանության նախկին նախարար Սեյրան Օհանյանն ուղերձ է հղել 44-օրյա պատերազմի տարելիցի կապակցությամբ։

Նա իր խոսքն ուղղում է հայ ժողովրդին, սպաներին, ենթասպաներին, զինվորներին, կամավորականներին, երկրապահներին, հանուն հայրենիքի նահատակված հերոսների մայրերին ու հայրերին, քույրերին ու եղբայրներին.

«2020 թվականի սեպտեմբերի 27-ին ադրբեջանական զինված ուժերը հարձակվեցին Արցախի վրա։ Նրանց նպատակը մեկն էր՝ բնաջնջել Արցախը և իր հայրենիքում ապրող, արարող, խաղաղ հայ ժողովրդին։ Դրա վառ ապացույցն են արգելված զինատեսակներով մարտական գործողությունները, որոնք թիրախավորել էին ոչ միայն ողջ սահմանագիծը, այլև խաղաղ բնակավայրերը, տները, դպրոցները, եկեղեցիները, վանքերը, հիվանդանոցները, նույնիսկ մարդասիրական միջանցք չտրամադրելով վիրավորների, խաղաղ բնակիչների տարհանման համար։ Այս ամենը ուղեկցվել է հակառակորդի կողմից հատուկ դաժանությամբ իրականացված ծանրագույն հանցագործություններով։ 

Թուրք-ադրբեջանական տանդեմի հանցագործությունները շարունակվեցին նաև 44-օրյա պատերազմից հետո, և այսօր Արցախը կանգնած է լրջագույն խնդիրների առջև։ Չափազանցություն չի լինի, եթե ասենք, որ վտանգված են Հայաստանի ինքնիշխանությունը, պետականությունը:

Մեր պետության առջև ծառացած սպառնալիքները չեզոքացնելու և անվտանգությունն ապահովելու համար կարևոր նախապայման է տեղի ունեցածի օբյեկտիվ և հանգամանալից վերլուծությունը:

Ինձ համար կրկնակի դավաճան է նա, ով հայտարարում է, թե հայկական բանակն է պարտվել. սա թշնամու երազանքն է, որն անկատար է մնացել: Ադրբեջանական ԶՈւ-ն երբեք չեն կարողացել հաղթել հայկական բանակին, պարտվել է Հայաստանի Հանրապետության գործող իշխանությունը, որն իր աններելի սխալների պատճառով  արցախյան հիմնահարցի արդարացի կարգավորումը մատնել է վտանգավոր անորոշության: Եվ փաստացի այսօր Ռուսաստանի Դաշնության խաղաղապահ ուժերն են ապահովում Արցախում ապրող մեր հայրենակիցների անվտանգությունը:

Ես առավել քան վստահ եմ, որ ճիշտ կառավարման պայմաններում պետությունը պարտավոր էր հասնել հաջողության։ Իսկ այսօր մեր հայրենիքի ճակատագրով մտահոգ համարձակ ու վճռական անհատների ներքին ու արտաքին գրագետ քաղաքականություն վարելու շնորհիվ մենք կարող ենք ունենալ արժանապատիվ խաղաղություն, բարեկեցիկ հայրենիք, ուժեղ ու անվտանգ Արցախ և Հայաստան»։