կարևոր
298 դիտում, 3 շաբաթ առաջ - 2021-09-22 16:20

Թուրքիայի նախագահը խոսել է 44-օրյա պատերազմից նաև աջակցություն հայտնել Ուկրաինայի տարածքային ամբողջականությանը. ՏԵՍԱՆՅՈՒԹ

Թուրքիայի նախագահը ՄԱԿ-ի գլխավոր ամբիոնից հայտարարում է, թե իբր վերջին շրջանում կարեւոր քայլեր են արվել Կովկասում կայունության հաստատման համար ու այդ համատեքստում հիշատակում է Արցախի դեմ Ադրբեջանի սանձազերծած պատերազմը՝ հայ ժողովրդի դեմ դրսեւորած ագրեսիան ներկայացնելով որպես Բաքվի ինքնապաշտպանության իրավունքի իրացում:

Հետո Էրդողանն անցնում է Ուկրաինայի տարածքային ամբողջականությանը ու ՄԱԿ-ի Գլխավոր ասամբլեայի ամբիոնից՝ միջազգային հանրությանն ուղղված ելույթում, բաց տեքստով դուրս գալիս Մոսկվայի դեմ՝ հերթական անգամ ասելով, որ Թուրքիան չի ճանաչում Ղրիմի միացումը Ռուսաստանին:
Թուքրիայի նախագահի այս հայտարարությանն արձագանքել են հենց Ղրիմից: Զգուշացնում են՝ Մոսկվայի դեմ ոչ բարեկամական խոսքերը կարող են թանկ նստել Անկարայի վրա, իսկ պատմության մեջ նման օրինակները քիչ չեն:

Նյու Յորքում Էրդողանի այս ելույթից առաջ էլ Թուրքիայի արտգործնախարարությունը հայտարարել էր, որ Ղրիմում անցկացված Պետդումայի ընտրություններն Անկարայի համար իրավական ուժ չունեն: Կրեմլում Թուրքիայի այս պահվածքն անընդունելի են որակել:
Եվ այս ամենի ֆոնին մի քանի օրից՝ սեպտեմբերի 29-ին, Ռեջեփ Էրդողանը կմեկնի Սոչի՝ հանդիպելու Ռուսաստանի նախագահ Վլադիմիր Պուտինի հետ:

Մանրամասները՝ Մարինե Մելիքսեթյանի տեսանյութում: