Մենք այսօր չունենք տրամադրություն տոնելու այս օրը․ անկախության իրական տերերն այսօր Եռաբլուրում են․ Կարին Տոնոյան․ ՏԵՍԱՆՅՈՒԹ

Մենք այսօր, իմ խորին համոզմամբ, չունենք անկախություն, որ տոնենք այս օրը, չունենք տրամադրություն տոնելու. Անկախության իրական տերերն այսօր Եռաբլուրում են: Այս մասին, այսօր՝ սեպտեմբերի 21-ին, Ազատության հրապարակում լրագրողների հետ զրույցում նշեց 44-օրյա պատերազմում զոհված, հետմահու Արցախի հերոս կոչման արժանացած Մենուա Հովհաննիսյանի մայրը՝ Կարին Տոնոյանը:

«Մեր զավակներն իրենց մահով ապացուցեին, որ իրենք են տերերը: Այսօր միակ չգրավված ամրոցը մնում է Եռաբլուրը, հետեւաբար, մենք ցանկություն հայտնեցինք մի քանի մայրերով, որ գնանք այսօր Եռաբլուր: Մենք ուզում ենք ուղղակի երդվել մեր զավակներին, որ շարունակելու ենք մեր պայքարը եւ մի օր անպայման վերադարձնելու ենք Հայոց անկախությունը:

Այսօր ինքնախաբեությամբ տառապելը ծիծաղելի է, մեր անկախությունը ամեն տեղ գրավված է: Սահմաններին եւ ռուսական դրոշ, եւ ադրբեջանական դրոշ կա: Մեր հարազատ լեռների վրա այսօր տարբեր դրոշներ են:

Այսօր տեսնում ենք, որ մեր երկրի ղեկավարը խնդրում է, որ թշնամին իր հետ հանդիպի: Երբեւէ նման բան չէր եղել, ինչը շատ վիրավորական է: Մեր զավակների առեւանգում են մեր սահմաններից ու մենք ոչինչ չենք կարողանում անել:

Այո, կարելի էր նշել այս օրը. Պետք է ռազմական հաստատությունների ուսանողները քայլեին որպես ապագա բանակի այսօրվա կերտողներ: Պետք է նրանց հետեւից քայլեին աշակերտները՝ մեր հերոսների նկարներով, որպեսզի ցույց տային, որ այդ հերոսների հետեւից գալիս է նոր սերունդը, որը պետք է տեր կանգնի հայրենիքին: Նրանց հետեւից թող հրավիրեին մեզ՝ մայրերին: Դրանից հետո էլ թող գային հայ մարդիկ, որոնք հասկանում են, որ հային երբեւէ ընկճել հնարավոր չէ»,-ասաց նա:

Մանրամասները՝ տեսանյութում։