կարևոր
508 դիտում, 1 շաբաթ առաջ - 2021-09-15 14:53

Արմեն Չարչյանի մոտ զարգացել է թոքաբորբ, ստանում է 100-ից ավելի ինսուլինի չափաբաժին․ Արամ Վարդևանյան. ՏԵՍԱՆՅՈւԹ

Բժշկական նորմատիվների համաձայն՝ 60-ից բարձր ինսուլինային չափաբաժինը արդեն իսկ ենթադրում է կրիտիկական վիճակ, իսկ Արմեն Չարչյանը, այս պահի դրությամբ, ստանում է 100-ից բարձր ինսուլինային բաժին։ Այս մասին այսօր լրագրողների հետ զրույցում ասաց «Հայաստան» դաշինքի պատգամավոր Արամ Վարդևանյանը, ով տեսակցել է նույն դաշինքի պատգամավոր, «Իզմիրլյան» բժշկական կենտրոնի նախկին ղեկավար Արմեն Չարչյանին։

«Չարչյանի մոտ զարգացել է թոքաբորբ: Եթե փորձեմ սեփական հայացքով համեմատություն տանել, ապա ինտենսիվ բժշկական հսկողության տակ գտնվելը որոշակի կայունացման հանգեցրել է, բայց թոքաբորբի պայմանը, ինսուլինի նման միավորը իսկապես ծայրահեղ վիճակ է առաջացնում:

Իր կամքը, իհարկե, տեղն է, բայց նման պայմաններում կալանավորումը դեռևս որպես խափանման միջոց պահելը խոշտանգում է, մարդասիրական ցանկացած արժեքի ոչնչացում է»,-ասաց Վարդևանյանը:

Ըստ նրա՝ եթե Արմեն Չարչյանը ավելի շուտ տեղափոխված լիներ մասնավոր հիվանդանոց, գուցե վիճակը ավելի լավ լիներ։

«Չարչյանը դժվարությամբ է խոսում և հաղորդակցվում, այդ պատճառով իր տեսակցությունը կարճ է եղել։ Առողջական լուրջ խնդիրները, որոնք ունի Արմեն Չարչյանը, կալանքի հետ անհամատեղելություն են առաջացնում»։

Վարդևանյանի խոսքով՝ անվիճելի է, որ Արմեն Չարչյանի նկատմամբ իրականացվողը քաղաքական հետապնդում է։

Մանրամասները News.am լրատվական կայքի տեսանյութում՝