կարևոր
331 դիտում, 5 օր առաջ - 2021-09-14 20:10

Դատավորների փոխարեն ընդդիմադիր պատգամավորների սուր հարցերն ուղղված էին նրանց ներկայացնող՝ ԲԴԽ նախագահի պաշտոնակատարին․ ՏԵՍԱՆՅՈՒԹ

«Հայաստան» խմբակցությունը չմասնակցեց Կոռուպցիայի կանխարգելման հանձնաժողովի անդամի ընտրությանը: Որեւէ անձնական խնդիր, պարզապես խմբակցությունը չի վստահում կոռուպցիայի դեմ պայքարի գործող  համակարգին.այն կիսատ է ու անվստահելի, առավել եւս, որ զրոյացրել է ընդդիմության մասնակցությունը:

66 կողմ ձայնով Արդարադատության նախարարության հակակոռուպցիոն քաղաքականության մշակման եւ մոնիթորինգի վարչության պետ Մարիամ Գալստյանը դարձավ Կոռուպցիայի կանխարգելման հանձնաժողովի անդամ:

Վճռաբեկ դատարանի քաղաքացիական եւ վարչական պալատի դատավորի թեկնածուներին էլ ներկայացրեց Բարձրագույն դատական խորհրդի  նախագահի պաշտոնակատար Գագիկ Ջհանգիրյանը: Բայց ոչ մի հարց նրան` թեկնածուների մասին:

Արամ Վարդեւանյանի գնահատմամբ էլ Գագիկ Ջհանգիրյանի նախագահությունը Բարձրագույն դատական խորհրդում  կհիշվի՝ դատարաններում գործերի էլեկտրոնային մակագրման համակարգի անհետացմամբ, ինչի հետեւանքով դրանք մակագրվում են իշխանության ցանկալի դատավորներին:

Աղվան Վարդանյանն էլ հիշեց 98 թվականի նախագահական ընտրությունները, երբ ինքն ու Գագիկ Ջհանգիրյանը միասին աշխատել են Ռոբերտ Քոչարյանի շտաբում: Հիմա, որ  իշխանությունը փոխվի, պատրաստ է արդյոք Ջհանգիրյանը  նորից սիրով համագործակցել իրենց հետ:

Վճռաբեկ դատարանի դատավորի թեկնածուները երեքն էին՝ Վերաքննիչ վարչական դատարանի նախագահ Հովսեփ Բեդեւյանը եւ վարչական դատարանի դատավորներ՝ Հրաչ Այվազյանն ու Լիանա Հակոբյանը: Երեքն էլ խուսափեցին գնահատել, որքանով էր օրինական վարչապետի հորդորով դատարանների մուտքերը շրջափակելը. ասացին կաշկանդված են պաշտոնով:  Ընտրվեց Հովսեփ Բեդեւյանը:

Մանրամասները՝ Անահիտ Հովհաննիսյանի տեսանյութում։