կարևոր
415 դիտում, 2 շաբաթ առաջ - 2021-09-14 10:33

«Հայաստան» խմբակցությունը չի մասնակցի Կոռուպցիայի կանխարգելման հանձնաժողովի անդամի թեկնածուի քվեարկությանը. Արծվիկ Մինասյան

«Հայաստան» խմբակցությունը չի մասնակցի Կոռուպցիայի կանխարգելման հանձնաժողովի անդամի թեկնածուի քվեարկությանը. Արծվիկ Մինասյան

«Հայաստան» խմբակցությունը չի մասնակցի Կոռուպցիայի կանխարգելման հանձնաժողովի անդամի թեկնածուի քվեարկությանը: Այս մասին Կոռուպցիայի կանխարգելման հանձնաժողովի ընտրության հարցի քննարկման ժամանակ՝ մտքերի փոխանակման փուլում, հայտնեց «Հայաստան» խմբակցության քարտուղար Արծվիկ Մինասյանը:

«Չափազանց սկզբունքային նշանակություն ունի այն քաղաքականության հիմադրույթը, թե ի վերջո մենք ինչպես ենք պատկերացնում հակակոռուպցիոն քաղաքականությունը մեր երկրում: Անշուշտ, սա ոչ միայն անցումային, այլ բոլոր տիպի երկրների համար հիմնարար հարցերից մեկն է, առավել ևս մեր նման երկրի, որն անցնելով խորհրդային կարգրերով, որտեղ չափազանց մեծ էր կոռուցիայի դերը և նշանակությունը: Անցումային շրջանում նույնպես զերծ չենք մնացել բացասական երևույթից, ավելին այն շատ ավելի խորը ազդել է երևույթների վրա:

Պատգամավորը նշել է, որ երկար ժամանակ քննարկումների արդյունքում որդեգրվել է մի մոդել, որտեղ, մեր խորին համոզմամբ, չի կարող հակակոռուպցիոն քաղաքականությունը ունենալ դրական արդյունք, քանի որ կոռուպցիան ծնող հիմնական շարժառիթը ու պատճառը իշխանական լծակն է՝ այսինքն ազդեցության, թե՛ հանրային և ֆինանսական ռեսուրների հասանելիության, թե՛ այս ռեսուրսների բաշխման և թե՛ հանրային իրավունքների տրամադրման որոշումների կայացման մակարդակում:

«Այս առումով սկզբունքային նշանակություն ունի, թե որոնք են այն կոռուպցիայի դեմ պայքարի հակահամակարգային տարրերը, որ պետք է նպաստեն, որպեսզի կոռուպցիայի դեմ պայքարը արդյունավետ լինի:

Դեռևս 2000-ականների կեսերից սկսած ՀՅԴ-ն բազմիցս այս մասին ոչ միայն միջազգային գործըներների հետ աշխատանքի ընթացքում է կարևորել, այլ նաև մի քանի անգամ օրենսդրական նախաձեռնությունների, առաջարկությունների տեսքով ներկայացրել է իր մոտեցումները: Եվ մեր կուսակցությունը մեծ դերակատարություն ունի ԳՐԵԿՈՅԻ՝ Հայաստանի անդամակցության հարցում: Այս համակարգում ամենաակտիվ մասնակցությունն է ունեցել Արմեն Ռուստամյանը:

Մեր համար սկզբունքային նշանակություն է ունեցել բոլոր ժամանակներում, թե՛ այն ժամանակ, որ ընդդիմություն ենք եղել և թե՛ այն ժամանակ, որ իշխանության մաս ենք եղել: Հակակոռուպցիոն քաղաքականության կենտրոնական, սկզբունքային հարցերից մեկը ընդդիմության դերակատարությունն է: Եվ պատահական չէ, որ մեր բոլոր պնդումներում եղել է հիմնավորում՝ հակակոռուպցիոն մարմնում, տվյալ դեպքում կոռուպցիայի կանխարգելման հանձնաժողովի ղեկավարումը կամ առնվազն ազդեցիկ դերակատարումն այս մարմնի գերծունեության մեջ պետք է քաղաքական ընդդիմությունը ունենա»,-ասել է նա:

Մինասյանը նշել է, որ այն մոդելը, որը որդեգրվել է հիմա, բացարձակ զրոյացրել է ընդդիմության դերակատարութունը: Ըստ պատգամավորի՝ կոռոպցիայի դեմ պայքարի կենտրոնական տեղում պետք է լինի ընդդիմությունը, որը պետք է կարողանա զսպել, հասնել այն բանին, որ իշխանական լծակների տիրապետող անձինք կարողանան զերծ մնալ կամ նվազագույնի հասցնել կոռուպցիոն դրսևորումները:

«Ընդդիմությունն այստեղ ո՞ւր է, որտե՞ղ է, ինչպե՞ս պետք է կարողանա օբյեկտիվ տեղեկատվություն ստանա պառլամենտը, երբ չկա ընդդիմության խոսքը», - ասաց Մինասյանը: