կարևոր
490 դիտում, 2 շաբաթ առաջ - 2021-09-11 20:45

Բողոքի ալիք Եվրոպայում․ Ֆրանսիայում, Ավստրիայում, Շվեյցարիայում բողոքում են ՔՈՎԻԴ-19-ով պայմանավորված սահմանափակումների դեմ. ՏԵՍԱՆՅՈՒԹ

Արդեն 9-րդ շաբաթն է՝ Փարիզում բողոքում են, այսպես կոչված, «առողջության անձնագրերի» եւ մի խումբ մասնագետների, օրինակ՝ բուժաշխատողների պարտադիր պատվաստման դեմ:

Այս շաբաթ ցույցերը նոր թափ են ստացել:

Աշակերտներն ու ուսանողները, ամառային արձակուրդներից հետո, վերսկսել են դասերը, ինչի ֆոնին Ֆրանսիայի նախագահ Էմանուել Մակրոնը հորդորել է 12 տարեկանից բարձր դեռահասներին պատվաստվել Քովիդ-19-ի դեմ: Սա ավելի է բորբոքել կրքերը: Կառավարության սահմանած կարգի համաձայն՝ հուլիսի 21-ից Ֆրանսիայում հանրային վայրեր այցելելու համար մարդիկ պետք է ցույց տան պատվաստումը հավաստող վկայական կամ թեստի բացասական պատասխան:

Կորոնավիրուսով պայմանավորված սահմանափակումները փողոց են հանել նաեւ հազարավոր ավստրիացիների: Սեպտեմբերի 15-ից Ավստրիայում գործելու են նոր կանոններ: Չպատվաստածները ստիպված կլինեն ռեսպերատոր դիմակներ կրել: Եթե վարակի տարածման տեմպերը չդանդաղեն, լոքդաուն կգործի միայն չպատվաստվածների համար:

Վիեննայի փողոցները ողողած ավստրիացիները դժգոհում են՝ կառավարությունը հասարակությանը բաժանում է խմբերի՝ պատվաստավծների ու չպատվաստավծների: Պատվաստման պահանջը զայրացրել է նաեւ շվեյցարացիներին: Լյուցեռն քաղաքում հավաքվածները պնդում են՝ պետք է իրենք որոշեն՝ ցանկանում են պատվաստվել, թե՝ ոչ:
 
Բողոքի ալիք է անցնում նաեւ Բեռլինով: «Ո՞ւմ է պատկանում քաղաքը», «Միասին սոցիալական պառակտման դեմ» վանկարկումներով՝ գերմանացիներն էլ դժգոհում են անհավասար եկամուտի եւ մայրաքաղաքում բնակարանների բարձր վարձավճարների դեմ: