կարևոր
556 դիտում, 2 շաբաթ առաջ - 2021-09-09 14:52

Սահմանային բնակիչների կյանքի իրավունքը խախտված է. թշնամու գործողությունները գնալով ավելի ինտենսիվ են դառնում. ՀՀ ՄԻՊ

Սահմանային բնակիչների կյանքի իրավունքը խախտված է. թշնամու գործողությունները գնալով ավելի ինտենսիվ են դառնում. ՀՀ ՄԻՊ

Սահմանային բնակիչների կյանքի իրավունքը խախտված է: ՀՀ ՄԻՊ Արման Թաթոյանը խորհրդարանում քննարկման ժամանակ ներկայացրել է այն սոցիալական խնդիրները, որոնք առաջացել են սահմանամերձ դարձած բնակավայրերում՝ ադրբեջանցի զինվորականների ներկայության պատճառով:

«Խոսքը վերաբերում է պարբերական կրակոցներին՝ Ադրբեջանի ԶՈՒ-ի կողմից, որոնք դարձել են թիրախային, տների ուղղությամբ են անգամ կրակում»,-ասել է ՄԻՊ-ը:

Ըստ Թաթոյանի՝ ադրբեջանցի զինվորականների ներկայությունն ինքնին կյանքի իրավունքի խախտում է, մեր երկիրը լիարժեք իրավունք ունի կյանքի իրավունքի խախտման վերացման պահանջներ ներկայացնելու:

ՀՀ ՄԻՊ-ը առաջ է քաշել մեկ այլ լուրջ խնդիր՝ ադրբեջանցի զինվորականների հարձակումները քաղաքացիական անձանց՝ հատկապես հովիվիների վրա: Բազմաթիվ են նաև սեփականության իրավունքի խախտման դեպքերը.

«Մասնավոր սեփականատերերի պատկանող բազմաթիվ հողեր, համայնքային սեփականության հողատարածքներ, վարձակալած հողատարածքներ գտնվում են ուղիղ Ադրբեջանի վերահսկողության տակ , շատ դեպքերում իրենք ֆիզիկապես ներկա են այդ վայրերում: Խոսքը միայն մայիսի 12-ի և 13-ի ներխուժումներին չի վերաբերվում, դրանից առաջ էր այդպես: Նրանք ֆիզիկապես ներկա են մարդկանց՝ կադաստրային փաստաթղթերով տրամադրված հողատարածքներում, տներում»,-ասել է Թաթոյանը:

ՀՀ ՄԻՊ-ը միևնույն ժամանակ ընդգծել է, որ Ադրբեջանցիների գործողությունները գնալով ավելի ինտենսիվ են դառնում.

«Անգամ, եթե նրանք մեկ շաբաթ ոչինչ չձեռնարկեն, այդ հարցերը չեն լուծվելու, եթե անգամ մեկ ամիս չկրակեն, միևնույն է նրանց ներկայությունն արդեն կյանքի իրավունքի կոպիտ ոտնահարում է»,-ասաց Թաթոյանը և հավելեց, որ այս ամենի պատճառն անպատժելիությունն է.

«Նրանք հստակ տեսնում են, որ ինչ էլ անում են, չեն պատժվում, այլ իրենց իշխանությունները միայն խրախուսում են։ Ակնհայտ է մեկ բան` նրանք չեն հանգստանալու, եթե մենք ինքներս պաշտպանության ամուր երաշխիքներ չներդնենք»,-եզրափակել է ՄԻՊ-ը: