կարևոր
544 դիտում, 1 շաբաթ առաջ - 2021-09-09 12:48

«Հայաստան» խմբակցության պատգամավորներն այցելել են Արմեն Չարչյանին

«Հայաստան» խմբակցության պատգամավորները գնացել են «Քանաքեռ-Զեյթուն» բժշկական կենտրոն՝ Արմեն Չարչյանին տեսակցության։

«Ե՛վ փաստաբանները, և՛ բժիշկները խոսել են այն մասին, որ պրոֆեսոր Չարչյանի առողջական վիճակն անհամատեղելի է կալանքի հետ։ Սա պարզապես այսօրվա քաղաքական իշխանության կողմից խոշտանգում և հետապնդում է ո՛չ միայն պարոն Չարչյանի, այլ «Հայաստան» խմբակցության մյուս պատգամավորների ու բազմաթիվ աջակիցների նկատմամբ», - լրագրողների հետ զրույցում նշել է «Հայաստան» խմբակցության անդամ, ԱԺ փոխնախագահ Իշխան Սաղաթելյանը։

Նրա խոսքով՝ իրենց խմբակցության պատգամավորների շուրջ 10 տոկոսն այսօր ձերբակալված է տարբեր շինծու մեղադրանքներով, այդ թվում՝ Սահմանադրության կոպիտ ոտնահարմամբ։

«Սա է ժողովրդավարական արժեքներից խոսող այսօրվա իշխանության կերպարը», - ասել է Սաղաթելյանը։

Նշենք, որ «Վարդաշեն» ՔԿՀ-ում պրոֆեսոր Արմեն Չարչյանի առողջական վիճակը կտրուկ վատացել էր, ինչը պայմանավորված է նրա մոտ առկա շաքարային դիաբետով (ծանր ձև), և նա տեղափոխվել է «Քանաքեռ-Զեյթուն» բժշկական կենտրոն՝ շաքարային բաժանմունք։ 

«Պնդում եմ՝ Արմեն Չարչյանի մոտ ախտորոշված հիվանդությունն անհամատեղելի է կալանավորման հետ, և պրոֆեսորն օր առաջ պետք է ազատ արձակվի»,- նշել էր Արմեն Չարչյանի փաստաբան Էրիկ Ալեքսանյանը։

«Հայաստան» խմբակցությունն էլ հայտարարություն էր տարածել և նշել, որ Արմեն Չարչյանի նկատմամբ իրականացվող քաղաքական հետապնդումը վերածվել է վերջինիս կյանքին և առողջությանն ուղղված սպառնալիքի: