կարևոր
886 դիտում, 2 շաբաթ առաջ - 2021-09-06 17:35

Խաղողագործները փակել են Երևան-Աշտարակ մայրուղին․ բողոքում են մթերման գներից․ ՏԵՍԱՆՅՈւԹ

Խաղողի մթերման համար այս տարին բարենպաստ չէր։ Խաղող շատ կա, բայց գործարարները հրաժարվում են մթերել. Արագածոտնի մարզի խաղողագործները փակել են Երևան-Աշտարակ մայրուղին: Նրանք իրենց խնդիրների լուծումն են պահանջում պատկան մարմիններից։

Նրանց խոսքով՝ խաղող մթերողները պայմանագրում հատուկ կետ են մտցրել, ըստ որի գնիջեցում է նախատեսվում՝ պահանջվող որակի խաղող չբերելու դեպքում։  

«Փաշինյանը որ ասում է 4 միլիարդ են փոխանցել, դա այսօր դուրս է գալիս կամ փուչիկ, կամ ծանոթի միջոցով կամ էլ չգիտեմ ինչ: Այսօր խաղողն ընդունում են 115 դրամ։ Խաղողի գործարանների կեսը հրաժարվում են խաղող ընդունել, ասում են՝ անցած տարվանից իրենց հորերը լիքն են: Հերիք չէ այսօր մեկ շիշ սովորական ջրի գին չի կազմում խաղողը, հիմա էլ ասում են գնիջեցում: Կարող է ասեն 60 դրամ ա, դատարկում ես, դատարկի, չէ դու գիտես»,- նշել է ակցիայի մասնակից խաղողագործներից մեկը՝ հավելելով, որ իրենց ասել են, թե գումարն էլ 270 օր հետո է լինելու։

Հիշեցնենք, որ մի քանի օր առաջ էլ խաղողի մթերման խնդիրների լուծման պահանջով գյուղացիները փակել էին Երևան-Երասխ ավտոճանապարհը:

Իսկ Կառավարության վերջին նիստին փոխվարչապետ Սուրեն Պապիկյանը հայտարարել էր, թե Հայաստանում այլևս չեն լինելու իրենց բերքն իրացնել չկարողացող խաղողագործներ, այլևս չի լինելու դեպք, երբ խաղողագործները, առանց հիմնավորումների, կփակեն ճանապարհը։