կարևոր
421 դիտում, 2 շաբաթ առաջ - 2021-09-03 21:19

Վարուժան Ներսեսյանն իր հավատարմագրերն է հանձնել Մեծ Բրիտանիայի դիվանագիտական կորպուսի փոխմարշալին

Վարուժան Ներսեսյանն իր հավատարմագրերն է հանձնել Մեծ Բրիտանիայի դիվանագիտական կորպուսի փոխմարշալին

Սեպտեմբերի 3-ին Միացյալ Թագավորությունում ՀՀ նորանշանակ դեսպան Վարուժան Ներսեսյանն իր հավատարմագրերի պատճենն է հանձնել ՄԹ դիվանագիտական կորպուսի փոխմարշալ եւ Արտաքին գործերի եւ զարգացման Ֆորին օֆիսի արարողակարգի ծառայության տնօրեն Վիկտորիա Բասբիին:

«Շնորհավորելով դեսպանին ՄԹ-ում իր դիվանագիտական առաքելության մեկնարկի կապակցությամբ, Վիկտորիա Բասբին հաջողություն է մաղթել Վարուժան Ներսեսյանին՝ վստահություն հայտնելով, որ նրա գործունեությունը նոր լիցք եւ բովանդակություն կհաղորդի երկկողմ հարաբերություններին։

Դեսպանը շնորհակալություն է հայտնել ջերմ ընդունելության եւ բարի մաղթանքների համար եւ շեշտել, որ ձգտելու է անել առավելագույնը՝ նոր մակարդակի հասցնելու ՀՀ-ՄԹ քաղաքական երկխոսությունը, ինչպես նաեւ ընդլայնելու երկկողմ փոխգործակցությունը տնտեսական, մշակութային, զբոսաշրջային եւ մի շարք այլ բնագավառներում։

Հանդիպման ընթացքում զրուցակիցներն ի թիվս այլ հարցերի անդրադարձել են այս տարվա նոյեմբերին Գլազգոյում կայանալիք Կլիմայի փոփոխության գագաթնաժողովին (COP26), որի համատեքստում դեսպան Ներսեսյանը ընդգծել է Հայաստանի պատրաստակամությունը իր կառուցողական ներդրումն ունենալու այդ գլոբալ խնդրին նվիրված կարևորագույն միջոցառման աշխատանքներին»։

Հիշեցնենք, որ Վարուժան Ներսեսյանը հետ էր կանչվել ԱՄՆ-ում ՀՀ դեսպանի պաշտոնից և նշանակվել Միացյալ Թագավորությունում ՀՀ դեսպան 2020 թվականի հուլիսի 16-ին, իսկ ԱՄՆ-ում դեսպան է նշանակվել «Իմ քայլը» խմբակցության նախկին ղեկավար Լիլիթ Մակունցը։