կարևոր
466 դիտում, 3 շաբաթ առաջ - 2021-09-03 18:32

Արմեն Չարչյանին Նորք-Մարաշ բժշկական կենտրոնից տեղափոխում են Վարդաշեն քրեակատարողական հիմնարկ

Արմեն Չարչյանին Նորք-Մարաշ բժշկական կենտրոնից տեղափոխում են Վարդաշեն քրեակատարողական հիմնարկ

«Հայաստան» խմբակցության պատգամավոր, բժիշկ Արմեն Չարչյանին Նորք-Մարաշ բժշկական կենտրոնից տեղափոխում են Վարդաշեն քրեակատարողական հիմնարկ։

«Հայաստան» խմբակցության պատգամավորները «Վարդաշեն» ՔԿՀ-ի մոտ են ի նշան բողոքի։ Չարչյանի պաշտպան Արամ Վարդևանյանը նշեց, որ կարծես նպատակ է դրված Չարչյանի առողջությունն ու կյանքը վտանգի տակ դնելու։

«Այս իրավիճակներում պետք է մարդասեր լինել. նպատակը ո՞րն է՝ մարդու առողջական վիճակը քայքայե՞լը: Որքան գիտեմ, բժիշկները բավարար չեն համարել Չարչյանի առողջական վիճակը, որպեսզի նրան ՔԿՀ տեղափոխեն»,- ասաց Վարդևանյանը։

Վարդևանյանը նշեց, որ ՀՀ-ում գործող դեսպանատներն էլ տարօրինակ ձևով լռում են` մարդու իրավունքների ոտնահարումը չնկատելով։

Հիշեցնենք՝ նա օգոստոսի 24-ին սրտամկանի սուր ինֆարկտ էր տարել, որը զարգացել էր քրեակատարողական հիմնարկում:

Արմեն Չարչյանի փաստաբանը պնդում է՝  նա դեռ այն առողջական վիճակում չէ, որ տեղափոխվի քրեակատարողական հիմնարկ. այդտեղ չկան անհրաժեշտ ռեսուրսները Չարչյանին բժշկական օգնություն ցուցաբերելու համար: Այս դեպքում, ըստ փաստաբանի, ամբողջ պատասխանատվությունը քրեակատարողական հիմնարկինն է, քանի որ փորձել են ազդել հիվանդանոցի տնօրինության որոշման վրա. ամենօրյա ռեժիմով հետաքրքրվել են, թե ինչու դուրս չեն գրում պատգամավոր Չարչյանին:

Հիշեցնենք, որ Վերաքննիչ քրեական դատարանը բեկանել էր Արմեն Չարչյանին գրավի դիմաց ազատ արձակելու որոշումը՝ Չարչյանի նկատմամբ ավելի վաղ ընտրված խափանման միջոց կալանավորումը թողնելով անփոփոխ։

Դատարանի որոշումից հետո Արմեն Չարչյանը սեփական նախաձեռնությամբ գնացել է քրեակատարողական հիմնարկ, ապա՝ կալանավորվել։