կարևոր
1120 դիտում, 3 շաբաթ առաջ - 2021-08-31 12:55

Իշխանական պատգամավորները դեմ քվեարկեցին Արթուր Ղազինյանի թեկնածությանը

Պաշտպանության եւ անվտանգության հարցերի մշտական հանձնաժողովն այսօրվա նիստում քննարկում էր հանձնաժողովի փոխնախագահի թեկնածությունը: Համաձայն Դոնթի բանաձևի՝ այդ պաշտոնում ընդդիմությունն առաջադրել է իր թեկնածուին՝ «Հայաստան» խմբակցության պատգամավոր Արթուր Ղազինյանին: 

«Ողբերգական պատերազմը փոխեց ընդդիմություն-իշխանություն հարաբերությունների ամբողջ ընթացքը, և ես ակնկալում էի, որ նոյեմբերի 9-ին պետության ղեկավարի պաշտոնը զբաղեցնողը կկանգներ ու կասեր. «Այսուհետ չեմ կարող պաշտոնավարել, որ ի զորու չեմ»,- Պաշտպանության և անվտանգության հարցերի մշտական հանձնաժողովի նիստում հայտարարաեց «Հայաստան» խմբակցության պատգամավոր Արթուր Ղազինյանը: Ղազինյանի խոսքով՝ պարտություն կրած, գրեթե կապիտուլացիոն ակտին հավասարազոր փաստաթուղթ ստորագրած ղեկավարը, եթե ունենում է ազգային մտածողություն և իր պետութան մասին մտածում է, ապա պետք է գիտակցեր և հասկանար, որ իր հետագա պաշտոնավարումը ոչ միայն չի բերելու իրավիճակի բարելավման, այլ իրավիճակն էլ ավելի է վատթարացնելու, ինչի ականատեսը եղավ ժողովուրդը հետպատերազմյան Հայաստանում:

Մինչ Արթուր Ղազինյանին հարց տալը՝ ՔՊ պատգամավոր Վիլեն Գաբրիելյանը Գեղամ Մանուկյանին հարց ուղղեց՝ «Եթե դուք լինեիք իմ փոխարեն, այդքանից հետո կընտրեի՞ք Արթուր Ղազինյանին»:

Գեղամ Մանուկյանը շեշտեց, որ Արթուր Ղազինյանի թեկնածությունը ստվերային համաձայնության կամ կոնսենսուսի խնդիր չէ, այլ օրենսդրությամբ ընդդիմությանը հատկացված տեղ: 

Քննարկումների արդյունքում, այնուհանդերձ, իշխանական պատգամավորները դեմ քվեարկեցին Ղազինյանի թեկնածությանը: Հանձնաժողովի նախագահը հայտնեց, որ ընդդիմությունը 5 օր ժամանակ ունի նոր թեկնածու առաջադրելու: 

Ավելի ուշ «Հայաստան» խմբակցությունը նորից առաջադրել է Արթուր Ղազիննյանի թեկնածությունը:

«Ես ուզում եմ շնորհակալություն հայտնել իշխանական պատգամավորներին ինձ դեմ քվեարկելու համար: Դուք իրականում ինձ շատ ավելի մոտիվացրեցիք շատ ավելի ինտենսիվ և հետևողական լինել հայրենիքին և ժողովրդին ծառայելու գործում», - ամփոփեց Արթուր Ղազինյանը: 

Հանձնաժողովի կազմում ընդդիմությունից ընդգրկված են «Հայաստան» խմբակցության պատգամավորներ Գեղամ Մանուկյանը, Գեղամ Նազարյանը, Արթուր Ղազինյանը  և «Պատիվ ունեմ» խմբակցությունից Տիգրան Աբրահամյանը: 

Հանձնաժողովի նախագահը ՔՊ խմբակցության պատգամավոր Անդրանիկ Քոչարյանն է: Իշխող խմբակցությունից այստեղ ներկայացված են նաև Վահագն Ալեքսանյանը, Արմեն Խաչատրյանը, Վիլեն Գաբրիելյանը, Գուրգեն Մելքոնյանը, Հայկ Սարգսյանը և Քրիստինե Պողոսյանը: