կարևոր
703 դիտում, 4 շաբաթ առաջ - 2021-08-24 15:49

Կարո՞ղ ենք այդպիսի մարդուն վստահել երկիր․ Գեղամ Մանուկյանը նկարագրեց Փաշինյանի պատերազմական ձախողումները

Կարո՞ղ ենք այդպիսի մարդուն վստահել երկիր․ Գեղամ Մանուկյանը նկարագրեց Փաշինյանի պատերազմական ձախողումները

Պատկերացնենք երկիր, որտեղ առավոտյան հայտնի է դառնում, որ թշնամին պատերազմ է սկսել, իսկ երկրի ղեկավարն առաջին բաներից, որ անում է, ֆեյսբուքում բանաստեղծություն է հրապարակում: «Հայաստան» խմբակցության պատգամավոր, ՀՅԴ անդամ Գեղամ Մանուկյանը ներկայացրեց Փաշինյանի ձախողումները, պահվածքը պատերազմի ընթացքում.

«Երկրում օրենքով ռազմական դրություն է հայտարարվում: Երկրի ղեկավարը ռազմական դրության այդ կանոնների սահմանափակումները խախտելով զինված ոժերի ռազմատեխնիկայի տեղաշարժի տեսանյութ է տարածում, երբ որ պաշտպանության նախարարության մամաուլի քարտուղարը ասում է՝ խելքի եկե՛ք անգրագետներ ռազմական տեխնիկայի տեղաշարժ չի կարելի նկարահանել: Դրանից հետո երևի խելքի են գցում ասելով՝ պարոն ղեկավար հեռացրու՛»,-ասաց պատգամավորը:

Մանուկյանը հիշեցրեց, որ Փաշինյանը եկել է խորհրդարան առանց պատրաստվելու և գրավոր տեքստի, երբ որ երկիրը պատերազմի մեջ է եղել և հասարակությանը, թշնամուն, միջազգային կառույցներին պետք է ուղերձներ հղվեր, նա բանավոր ելույթ է ունենում և հռետորաբանությամբ զբաղվում:

Խոսելով Կառավարության ծրագրի մասին՝ Գեղամ Մանուկյանը կարճ մեջբերում արեց. Պետական պահպանության ծառայությունը պետք է առանձնանա և ենթարկվի վարչապետին:

«Այսքան տարի՝ շուրջ երեք տասնամյակ, այդ պետական ծառայությունը բոլոր պետական պաշտոնյաների անվտանգությունն է ապահովվել: Ճիշտ է, երեք տարի է արևածաղկի նման անընդհատ փոխվում են պատասխանատուները, թիկնազորի անդամները. չեմ ուզում նրանց նեղացնել: Հիմա պատկերացրեք, որ այդ ՊՊԾ-ն իր հայտնի գեներալի կոչում ստացած հրամանատարով ենթարկվի ուղղակի միայն Նիկոլ Փաշինյանին.  ինչքան քթեր կջարդվեն և ինչքան պատգամավորների գլուխներ կկոտրվեն»,-նշեց Մանուկյանը:

Արձագանքելով Փաշինյանին Մանուկյանը հավելեց, որ ինքը խոսում էր սեպտեմբերի 27-ի Հայաստանի վարչապետի գործողությունների մասին:

«Հոկտեմբերի 6-ին տեղադրվում է լուսանկար, ու ասվում է Արցախի զինված ուժերի բարձրագույն ղեկավարության հետ որոշում ենք կայացրել հակահարված հասցնելու: Հարգելի հայրենակից այդ լուսանկարում երևում են մարդիկ, որոնք իրավունք չունեն անգամ դռներից այն կողմ գտնվելու: Չեմ ուզում վիրավորել Հակոբ Սիմիդյանին, բայց ԱԺ պատգամավորը ինչ գործ ունի ռազմական օպերացիայի պլանավորման:

2 օր հետո նույն մարդը արդեն դավաճաններ է փնտրում արդեն Հայաստանում: Եվ այն ինչի մասին խոսվում էր այդպես էլ չապացուցվեց:

Հաջորդ օր հոկտեմբերի 7-ին ռուսական հեռուստաալիքին տված հարցազրույցում արդեն նկարագրում է ռազմական օպերացիան, թե ինչպես են հաջողում և ինչ են անում: Այդ ամենի արդյունքը փաստորեն ողբերգական եղավ մեր զինված ուժերի համար: Բայց տեսաք, էլի մեղավորը դուք եք սիրելի հայրենակիցներ, քանի որ ընտրել եք»,-նշեց Գեղամ Մանուկյանը:

Նա հիշեցրեց, որ մի անգամ էլ Փաշինյանը համավարակի ընթացքում ասել է՝ եթե Կառավարությունը վատ է աշխատում, ուրեմն ժողովուրդն է մեղավոր, ժողովուրդն է ընտրել:

Փաշինյանի արձագանք-պատասխանը, եթե ընդհանրացված ներկայացնենք, կրկին նույնն էր՝ ժողովուրդն է ընտրել: Ժովողուրդը այդ ամենը գիտեր, նոր փաստեր չեն, և ընտրել է կրկին: