կարևոր
2356 դիտում, 1 ամիս առաջ - 2021-08-20 13:26

Այս նշանակումները վկայում են իշխանության անլուրջ վերաբերմունքի մասին՝ պետական ինստիտուտների նկատմամբ. Իշխան Սաղաթելյան

Այս նշանակումները վկայում են իշխանության անլուրջ վերաբերմունքի մասին՝ պետական ինստիտուտների նկատմամբ. Իշխան Սաղաթելյան

Տպավորություն է, որ որևէ պրոֆեսիոնալ դիվանագետ չցանկացավ մտնել պատասխանատվության տակ, և երկու-երեք ամիս փնտրտուքներից հետո այս ծանր իրավիճակում ԱԳ նախարար է նշանակվում՝ միայն քաղաքական որոշմամբ: «Փաստինֆո»-ի հետ զրույցում ասել է ԱԺ փոխնախագահ, ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով Արարատ Միրզոյանի՝ ԱԳ նախարար նշանակմանը:

«Որպեսզի գործող իշխանության վարած քաղաքականության անլրջության մակարդակը պարզ դառնա՝ ի՞նչ է նշանակում ԱԽ քարտուղարին նշանակել ԱԳ նախարարի տեղակալ, մեկ ամիս հետո նորից ազատել և վերադարձնել հին պաշտոնին: Սա վկայում է այս իշխանության անլուրջ մոտեցումների մասին, սրան իբրև նախաբան էր ԱՄՆ-ում ոչ դիվանագետի դեսպան նշանակելը, սա է այս իշխանության վարքագիծը, տեսակը»,-ասել է ԱԺ փոխնախագահը և հավելել, որ այս նշանակումները վկայում են իշխանության անլուրջ վերաբերմունքի մասին՝ պետական ինստիտուտների նկատմամբ:

Իսկ թե Արարատ Միրզոյանի նշանակումն ինչպե՞ս կանդրադառնա Հայաստանի արտաքին քաղաքականության վրա, Իշխան Սաղաթելյանն ասել է.

«Հայաստանի արտաքին քաղաքականությունը պայմանավորված չէ միայն ԱԳ նախարարով, այլ՝ ընդհանուր կառավարության որդեգրած քաղաքականությամբ: Ըստ էության՝ ԱԳՆ-ն իրականացնում է քաղաքական իշխանության որդեգրած քաղաքական գիծը: Առհասարակ, Հայաստանը լրջագույն խնդիրներ ունի իր արտաքին հարաբերություններում, ես չեմ կարծում, որ այս նշանակումից հետո որևէ դրական տեղաշարժ է լինելու, ընդհակառակը, որևէ լավ բան, ցավոք, մեզ չի սպասվում»,-ասաց զրուցակիցը:

Իշխան Սաղաթելյանը նաև ընդգծել է, որ նման քայլերը և նշանակումներն այլևս որևէ մեկին չեն զարմացնում.«Այն ինչ ունենք, արդեն բոլորսի հայտնի է, խնդիրն այն է, թե ոնց ազատվենք այս ամենից և երկիրը վերադարձնենք բնականոն զարգացման»: