Գորիսի համայնքապետարանի ձերբակալված աշխատակցուհին որոշման հրապարակման պահից ազատության մեջ է

Գորիսի համայնքապետարանի 66-ամյա ձերբակալված աշխատակցուհին՝ Սուսաննա Մկրտչյանը, չի կալանավորվի։ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, մերժել է Սուսաննա Մկրտչյանի նկատմամբ կալանավորումը որպես խափանման միջոց ընտրելու մասին ՔԿ քննիչի միջնորդությունը։ Այս մասին հայտնել է փաստաբան Էդգար Արամյանը։

«Սուսաննա Մկրտչյանը որոշման հրապարակման պահից ազատության մեջ է»,- նշել է փաստաբանը:

Հիշեցնենք, որ օգոստոսի 16-ին ՀՀ ՔԿ-ն որոշումներ է կայացրել Գորիս համայնքի ղեկավարի պաշտոնակատար Իրինա Յոլյանին, համայնքապետարանի երկու աշխատակիցներին ՀՀ քրեական օրենսգրքի 179-րդ հոդվածի 3-րդ մասի 1-ին կետով, իսկ համայնքի ղեկավարի տեղակալ Մենուա Հովսեփյանին՝ ՀՀ քրեական օրենսգրքի 149.1-րդ հոդվածի 2-րդ մասի 1-ին և 2-րդ կետերով, 179-րդ հոդվածի 3-րդ մասի 1-ին և 179-րդ հոդվածի 2-րդ մասի 1-ին կետերով նախատեսված հանցավոր արարքներ կատարելու համար որպես մեղադրյալներ ներգրավելու մասին: Նրանք ձերբակալվել են երեկ՝ նրանց նկատմամբ որպես խափանման միջոց կալանավորումն ընտրելու միջնորդության քննության նպատակով դատարան ներկայացվելու համար։