Իշխան Սաղաթելյանն ընտրվեց Ազգային ժողովի փոխնախագահ

ՀՀ Սահմանդրությամբ խորհրդարանական ընդդիմությանը վերապահված ԱԺ փոխխոսնակի պաշտոնում ընտրվեց «Հայաստան» խմբակցության պատգամավոր, ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը: 107 պատգամավորից քվեարկությանը մասնակցել է 103 պատգամավոր՝ 64 կողմ, 37 դեմ ձայների հարաբերակցությամբ, 2 քվեաթերթիկ ճանաչվել է անվավեր:  

Հիշեցնենք, որ նախորդ երկու օրերին իշխող մեծամասնությունը՝ «Քաղաքացիական պայմանագիր» խմբակցությունը, երկու անգամ տապալել է Սահմանադրությամբ ամրագրված խորհրդարանական ընդդիմությանը վերապահված Ազգային ժողովի փոխնախագահի պաշտոնում Իշխան Սաղաթելյանի ընտրությունը։ 

«Հայաստան» և «Պատվի ունեմ» խմբակցությունները կրկին առաջադրել էին Սաղաթելյանի թեկնածությունը: Այս անգամ ՔՊ-ն ստիպված եղավ ընդունել ընդդիմության օրակարգը։ Ընդդիմության համառ ջանքերի արդյունքում չխախտվեց ՀՀ Սահմանադրության պահանջը:

Չնայած այն հանգամանքին, որ «Քաղաքացիական պայմանագիր» խմբակցությունը, պնդելով հանդերձ, որ շահագրգռված է խորհրդարանական մարմինների շուտափույթ ձևավորմամբ և օր առաջ օրենսդրական աշխատանքին անցնել, այնուամենայնիվ ցանկանում էին նաև, որպեսզի ընդդիմությունը խնդրի իրենց քվեարկել Իշխան Սաղաթելյանի օգտին։ Երկու անգամ տապալեցին փոխխոսնակի ընտրությունը՝ անվավեր դարձնելով մի քանի քվեաթերթիկ: «Հայաստան» խմբակցության անդամ Արամ Վարդևանյանը ելույթի ժամանակ համոզմունք հայտնեց, որ սա եղել է իշխանության կազմակերպված դեմարշը, որպեսզի «Հայաստան» դաշինքը քվե խնդրի իրենցից: «Բայց մենք ձեզնից քվե չենք խնդրելու»,- նշում է Վարդևանյանը։

Այսկերպ է նաև արձագանքել փոխնախագահի թեկնածուն․ «Մենք ԱԺ-ում մուկն ու կատու չենք խաղում, թեկնածու ենք առաջադրել, քվեարկում եք քվեարկեք, չեք քվեարկում շարունակեք  չքվեարկել։ Եթե ուզում եք, որ այս ամբիոնից, որպես թեկնածու, խնդրեմ քվե տաք չեմ խնդրելու»,- խոսքն ուղղելով խորհրդարանական մեծամասնությանը՝  նշել է Իշխան Սաղաթելյանը։

Այսպիսով, ԱԺ նախագահի և նախագահի տեղակալի ընտրություններն ավարտված են։ Խորհրդարանն անցնում է մշտական հանձնաժողովների ձևավորման գործընթացին։