կարևոր
445 դիտում, 1 ամիս առաջ - 2021-08-03 16:11

Ձեր սկզբունքներն ու գործը երեսպաշտական են ու հակասական. Աղվան Վարդանյանը՝ լրագրողի վրա հարձակում գործած ԱԺ փոխնախագահի իշխանական թեկնածուին

ԱԺ փոխնախագահի պաշտոնում առաջադրված՝ «Քաղաքացիական պայմանագիր» խմբակցության պատգամավոր Հակոբ Արշակյանից «Հայաստան» խմբակցության պատգամավոր Աղվան Վարդանյանը փորձեց պարզե, թե արդյոք  ԱԺ-ում լրագրողների տեղաշարժման  վերաբերյալ  սահմանափակումներ սահմանելիս քննարկումներ են ունեցել լրատվամիջոցների հետ։

«30 տարի ԱԺ-ում լրագրողներն ազատ գործելու հնարավորություններ են ունեցել՝  ձեր սիրած, չսիրած իշխանությունների օրոք։ Հիմա սահմանափակել եք նրանց գործունեությունը և պատրաստվում եք էլ ավելի սահմանափակել,  ձեր սկզբունքներն ու գործը երեսպաշտական են ու հակասական։ Չէ՞ք պատրաստվում Ձեր ընտրվելու պարագայում վերանայել սահմանափակումները»,-հարցրեց Աղվան Վարդանյանը։

Հակոբ Արշակյանն արձագանքեց` առաջարկվող փոփոխությունները ոչ թե սահմանափակումներ են, այլ` ինստիտուցիոնալ բարեփոխումներ: 

«Ձեր ինստիտուցիոնալ բարեփոխումների արդյունքում մենք կամաց-կամաց վերածվում ենք բռնապետական երկրի»,- արձագանքեց Աղվան Վարդանյանը:

«Հայաստան» խմբակցության պատգամավոր Ագնեսա Խամոյանն ասաց, որ հայտնի միջադեպից երկու շաբաթ անց Արշակյանը հրաժարական է ներկայացրել, սակայն ստացվում է պատասխանատվության չի ենթարկվել, այժմ էլ նման բարձր պաշտոնի է հավակնում: Նա նաև հավելեց, որ ըստ իր տեղեկությունների մինչ այժմ տուժածի հետ առերեսում չի եղել: Խամոյանը հետաքրքրվեց, թե պատգամավորը սովորել է արդյոք կառավարել իր էմոցիաները, թե ոչ:

Հիշեցնենք, որ հենց Արշակյանն էլ, նախարարի պաշտոնում, անհանդուրժողական պահվածք դրսևորել լրագրողի նկատմամբ: Բարձր տեխնոլոգիաների արդյունաբերության նախարար Հակոբ Արշակյանը այս տարվա մարտին սրճարանում հարձակվել էր լրագրող Փայլակ Ֆահրադյանի վրա: Դատախազությունը գործն ուղարկել էր Հատուկ քննչական ծառայություն: Միջադեպից հետո Հակոբ Արշակյանը նախագահի հրամանագրով ազատվել է պաշտոնից՝ առանց հիմքերը նշելու: Մեկ ամիս անց ՀՔԾ-ն տեղեկացրել էր, որ. «Նախապատրաստված նյութերի հիման վրա որոշում է կայացվել քրեական գործ հարուցելը մերժելու մասին՝ հանցակազմի բացակայության հիմքով»: