կարևոր
997 դիտում, 1 ամիս առաջ - 2021-07-30 12:04

Պաշտոնյան իրեն պարգևատրած շքանշանը թողել է Ալբերտ Հովհաննիսյանի շիրմաքարին

Պաշտոնյան իրեն պարգևատրած շքանշանը թողել է Ալբերտ Հովհաննիսյանի շիրմաքարին

Նախորդ օրը «Եռաբլուր» պանթեոնում պետական մի պաշտոնյա տպագիր գրությամբ իրեն պարգևատրած «Հայրենիքին մատուցած ծառայությունների համար I աստիճանի» շքանշանը թողել է Ալբերտ Հովհաննիսյանի շիրմաքարին՝ ճիշտ համարելով նվիրել այն բոլոր անմահացած եղբայրներին: Այս մասին գրել է հերոս Ալբերտի հայրը՝ Արտակ Հովհաննիսյանը:

«Ճիշտ է, բոլորս էլ գիտակցում ենք, որ մենք թիկունքում ինչ էլ որ արած լինենք, միևնույն է պատերազմի ծանրությունը առաջնագծում տղաների ուսերին էր ընկած: Որ այսօր իրենց կյանքի գնով ենք ապրում ու ապրելու բեռը գնալով ավելի է ծանրանում, երբ սահմանում կրկին զինվորներ են անմահանում: Բայց այս համատարած խավարում, տվյալ անձնավորության՝ խղճի առաջ ազնիվ գտնվելու ու միաժամանակ տղերքի արածը այսկերպ գնահատելու քայլը, կրկին արժեւորեց մեր Հերոսների սխրանքը, քանզի նրանք ապրում են, քանի դեռ հիշում ենք ու գնահատում:

Շնորհակալ ենք Ձեզ, ոչ թե հայրենիքի համար իրենց կյանքը նվիրաբերած հայորդիներին խոնարհվելու համար, քանզի դա յուրաքանչյուրիս պարտքն է, այլ նրա համար, որ ձեր այս քայլով ընդգծեցիք, որ պետական ծառայողների շարքում կան նաև Ձեզ պես սրտով ու խղճով առաջնորդվող ողջամիտ մարդիկ ու ամենակարևորը՝  բոցավառեցիք մեր ազգային արժանապատվությունը վերագտնելու,  քնած վիճակից մի օր արթնանալու հույսը»,-ասված է գրառման մեջ։