կարևոր
1672 դիտում, 1 ամիս առաջ - 2021-07-28 23:37

Որդու գերեզմանից վերադառնալիս վթարի է ենթարկվել պատերազմում զոհված Դավիթ Այդոևի մայրը

Որդու գերեզմանից վերադառնալիս վթարի է ենթարկվել պատերազմում զոհված Դավիթ Այդոևի մայրը

Այսօր որդու գերեզմանից Երեւան վերադառնալիս Ապարան քաղաքի տարածքում վթարի է ենթարկվել եւ ծանր վիճակում` ողնաշարի բազմաթիվ կոտրվածքներով Էրեբունի ԲԿ Է տեղափոխվել Արցախի հերոս նահատակ Դավիթ Այդոեւի մայրը` տիկին Լալին: Այս մասին տեղեկացնում է «Եզդիների տուն» նախաձեռնության ղեկավար Այսեր Իսայանը:

«Նրան սպասում է բարդ վիրահատական միջամտություն։ Դավիթը տիկին Լալիի միակ զավակն էր», - հայտնում է նա:

Հիշեցնենք, որ Դավիթ Այդոևն ազգությամբ եզդի էր։ Ծնվել է 2000թ֊ի օգոստոսի 10֊ին Սպիտակ քաղաքում, մանկուց ապրել է Երեւանում։ Սովորել է Հայ֊Ամերիկյան բժշկական քոլեջում։ 

Նա ծառայության է անցել Ջաբրայիլում ու այդ ընթացքում իրեն պատվով է դրսեւորել զինծառայության մեջ: Ասում են՝ հրամանատարի վիրավորվելուց հետո՝ Դավիթն է ստանձնել զինվորների հրամանատարությունը, կարողացել է ճիշտ կողմնորոշվելու շնորհիվ գրագետ գործողություններ կազմակերպել ու գրավել թշնամու երկու դիրք: Այդ դիրքերից մեկն էլ իր պատվին է կոչվել՝ Այդոևի բլուր։ Ցավոք, Դավիթը հերոսաբար զոհվել է 2020 թվականի հոկտեմբերի 5֊ին։