Օրենքի կոպտագույն խախտմամբ կալանավորվում են Սյունիքում պանթյուրքիզմի դեմ պայքարողները, բայց թուրքը Սյունիք ոտք չի դնելու. Մենուա Հովսեփյան

https://yerkirmedia.am/hy/article/2021/07/16/43596Գորիսի փոխհամայնքապետ Մենուա Հովսեփյանը անդրադարձել է Գորիսի քաղաքապետ Առուշ Առուշանյանի կալանավորմանը։ Նշենք, որ դատարանը բավարարեց ՀՔԾ-ի միջնորդությունը և Առուշ Առուշանյանին 2 ամսով կալանավորելու որոշում կայացրեց։

«Ապօրինաբար և անհիմն կալանավորեցին Գորիս համայնքի ղեկավար Առուշ Առուշանյանին։

Ցավով պետք է ֆիքսեմ մի հանգամանք, բոլոր նրանք, որոնք պայքարում են պանթյուրքիզմի դեմ Սյունիքի մարզում կալանավորվում են կամ արդեն կալանավորված են օրենքի կոպտագույն խախտումներով եւ ապօրինի դրսևորումներով:
Աստված պահապան մեր ազգին....

թուրքը Սյունիք ոտք չի դնելու»,- գրել է Հովսեփյանը։

Հավելենք, որ այս պահին Սյունիքի 5 համայնքապետ կալանավորված է՝ Գորիսի համայնքապետ Առուշ Առուշանյան, Մեղրի համայնքի՝ օրերս հրաժական ներկայացրած ղեկավար Մխիթար Զաքարյանը, Քաջարանի քաղաքապետ Մանվել Փարամազյանը, Որոտանի համայնքապետ Սուրեն Օհանջանյանը և Քարահունջի ղեկավար Լուսինե Ավետյանը, 1-ը՝ ձերբակալված՝ Սիսիանի համայնքապետ՝ Արթուր Սարգսյան, որին կալանավորելու միջնորդությունն այսօր քննում է դատարանը:

Բացի համայնքապետերից առանց հիմնավորումների տասնյակ սյունեցիներ բերման են ենթարկվել: Որոտանի բնակիչներն ահազանգում են, որ ոստիկաններն ահաբեկում են և ստիպում համայնքապետերի դեմ ցուցմունքներ գրել:

Առանց որևէ հիմնավորման բերման են ենթարկվել Զանգեզուրի պղնձամոլիբդենային կոմբինատի անվտանգության ղեկավար Արամ Գասպարյանը և անվտանգության մայոր, Խորհրդային Միության սպորտի վարպետ Տիգրան Ներսիսյանը: Առանց պարզաբանումների մեծաթիվ քննիչներ եւ Ազգային անվտանգության ծառայության «Ալֆա» ջոկատի ծառայողները ներխուժել են Զանգեզուրի պղնձամոլիբդենային կոմբինատ և մի քանի ժամ շարունակ խուզարկում իրականացրել, արդյունքում կանգ է առել ՀՀ ամենախոշոր հարկատու ընկերություններից մեկի աշխատանքը: