կարևոր
1603 դիտում, 1 տարի առաջ - 2021-07-13 17:18

Սյունիքի ինքնապաշտպանությունը կազմակերպած համայնքապետերի հետապնդումը կապում ենք նաև առաջիկայում Հայաստանին սպասվող ցավոտ լուծումների հետ. Իշխան Սաղաթելյան․ ՏԵՍԱՆՅՈւԹ

Մեր երկրի դատախազը, քննիչը, ոստիկանը, ցավոք, արդեն նաև դատավորը մեկ մարդ է՝ ՀՀ վարչապետի աթոռը զբաղեցնող անձը, որը հետևողականորեն քաղաքական հետապնդումներ է իրականացնում: Այս մասին ասուլիսի ժամանակ հայտարարեց ՀՅԴ Հայաստանի ԳՄ ներկայացուցիչ, «Հայաստան» դաշինքի անդամ Իշխան Սաղաթելյանը:

«Նիկոլ Փաշինյանը կայացնում է քաղաքական որոշումներ, իսկ ուժային կառույցներին և իրավապահներին մնում է միայն իրենց երևակայության արդյունքում կեղծ մեղադրանքներ հորինել և հստակ հետապնդումներ իրականացնել տվյալ դեպքում Սյունիքի համայքապետերի նկատմամբ և «Հայաստան» դաշինքի աջակիցների, համախոհների նկատմամբ»,-ասաց Սաղաթելյանը:

Նա նաև նշեց, որ շատ հստակ ձևով Հայաստանում շարունակվում է երկրի դիմադրողականությունը կոտրելու և ջարդելու քաղաքականությունը և բոլոր ուժերն ու անհատները, որոնք մեր ազգային դիմադրողականության պահպանողն են, այդ մարդկանց փորձում են մեկուսացնել:

«Պատահական չէ, որ այս ամենը տեղի է ունենում Սյունիքում, ինչու չէ նաև Տավուշում, որտեղ բանակից հեռանում են լավագույն զինվորականները: Պատերազմի ընթացքում Սյունիքի ինքնապաշտպանությունը կազմակերպած համայնքի ղեկավարներին փորձում են ձերբակալել և կալանավորել և սա հստակ քաղաքականություն է, իսկ համայնքապետերի ապօրինի ձերբակալումները կապում ենք առաջիկայում ՀՀ-ին սպասվող ցավոտ լուծումների հետ»,- նշեց նա:

Նրա համոզմամբ՝ պատահական չէ, որ այս ամենը տեղի է ունենում Սյունիքում, ինչպես նաև՝ Տավուշում.

«Լավագույն զինվորականներին հեռացնում են բանակից, պատահական չէ, որ պատերազմի ժամանակ Սյունիքի ինքնապաշտպանությունը կազմակերպած համայնքի ղեկավարներին այսօր ձերբակալում են և կալանավորում: Այս ամենը կապում ենք նաև առաջիկայում Հայաստանին սպասվող ցավոտ լուծումների հետ»,-նշեց նա և հավելեց,- «Քաղաքական հետապնդումները շարունակվում են, և մենք բոլոր հնարավոր միջոցներով պայքարելու ենք սրա դեմ, որպեսզի թույլ չտանք մեր ժողովրդի դիմադրողականությունը և ապօրինի մեղադրանքներով մեկուսացնել մեր համակիրներին»: