«Բարգավաճ Հաայստան» կուսակցությունը Գագիկ Ծառուկյանի գլխավորությամբ այսօր Գյումրիում էր

Ես այստեղ եմ ձեզ ասելու այսօրվա վիճակը, երկրի վիճակը, տնտեսության վիճակը, մեր ժողովրդի վիճակը, կարգավիճակը: Այս մասին, այսօր՝ հունիսի 15-ին, Գյուրիում քարոզարշավի ժամանակ իր ելույթում նշեց ԲՀԿ առաջնորդ Գագիկ Ծառուկյանը:

Նա նշեց, որ հզոր պետություն ունենալն անհնարին է, քանի դեռ մարդիկ ապահովված չեն աշխատանքով, չեն փակվել ժողովրդի վարկերը, պարտքերն ու տույժերը: «Հզոր պետություններում ժողովուրդն ապրում է բարեկեցիկ կյանքով, ոչ թե ընտանիքները միանգամից մի քանի վարկեր են վերցնում: Այսօր ունենք 650 հազար ընտանիք, բայց ունենք 2 մլն 187 վարկառու։ Այսինքն՝  ցանկացած ընտանիք 2-3 վարկ ունի, որոնք կուտակել են այս երկու տարում: Տույժ տուգանքներն այնքան են շատացել, որ մարդը հույս չունի փակելու, մյուս կողմից աշխատանք չկա: Դրա համար անձամբ ես հաշվարկել եմ, որ մինչեւ 3 մլն դրամի վարկերը ներվեն»,-ասաց նա:

«Ես երեք ամսում Աբովյանում 20 շենք եմ կառուցել, հազար ընտանիքի համար: Պետությունը կարո՞ղ է մեկ տարում, ասենք թե, 2500 հոգու համար բնակարան կառուցի: Եթե անհատը կարող է երեք ամսում հազար հոգու համար կառուցի, պետությունը  լիարժեք մեկ տարում կարող է 2500-ը կառուցել»,-ասաց նա:  Ծառուկյանը նշեց նաև, որ նորաստեղծ ընտանիքների համար եւս պետք է բնակարաններ կառուցվեն, երիտասարդները կաշխատեն ամսական 70-80 հազար դրամ կվճարեն եւ տուն կունենան:

Գյումրեցիների հետ հանդիպման ընթացքում կուսակցության առաջնորդը խոսեց նաև Հայաստանի անվտանգության մասին. «Այսօր արդեն Ալիեւն ու Էրդողանը Շուշիում են, ծրագիր են գրում մեր հողում: Եթե Ալիեւը Էրդողանի հետ է բանակցություններ վարում, մենք էլ Ռուսաստանի հետ պետք է լինենք: Մեր սահմանները պետք է պահեն հայ և ռուս զինվորները, որ դրանք անսասան լինեն, որ անգամ ճանճ չանցնի»,- նշեց նա:

ԲՀԿ ղեկավարը հավելեց, որ իր կապերն ու հնարավորությունները լիարժեքորեն օգտագործելու է ժողովրդին ներկա ծանր վիճակից դուրս բերելու նպատակով: