կարևոր
385 դիտում, 1 շաբաթ առաջ - 2021-06-11 17:14

Փաշինյանը երբեք աչքի չէր ընկնում լրագրության մեջ էթիկական կանոնները պահպանողի դերում. Բորիս Նավասարդյան

Փաշինյանը երբեք աչքի չէր ընկնում լրագրության մեջ էթիկական կանոնները պահպանողի դերում. Բորիս Նավասարդյան

«Հայաստանում լրատվական դաշտի մեծ մասը ձևավորված է քաղաքական դաշտի պատվերով: Այնպես որ, այն բոլոր բացասական երևույթները կամ դրանց մեծ մասն ածանցյալ են լրատվամիջոցների գործունեության, դերի վերաբերյալ այն պատկերացումներից, որոնք ունեն մեր քաղաքական առաջնորդները»,- Panorama.am-ի հետ զրույցում ասել է Երևանի մամուլի ակումբի  նախագահ Բորիս Նավասարդյանը՝ մեկնաբանելով Նիկոլ Փաշինյանի այսօրվա հայտարարությունները լրագրողների ու լրատավական դաշտի վերաբերյալ: 

Նրա մոտեցմամբ՝ երբ քաղաքական գործիչները տեսնում են լրատվակամիջոցներում որևէ խնդիր, նույնն է ինչ նայում են հայելու մեջ և տեսնում են իրենց. «Եթե լրատվամիջոցներում կան «քիլլերներ», ուրեմն այդ «քիլլերներին» վարձել են քաղաքական գործիչները, և եթե աղբանոցի է նմանվել (լրատվական դաշտը.-խմբ.), գալիս է նրանից, որ աղբանոցի է վերածվել մեր քաղաքական դաշտը, լրատվամիջոցներն ընդամենը դրա շարունակությունն են, եթե այդպիսինն են»:

Նա նշել է, որ այսօր լրագրողները թիրախավորված են այնքանով, որքանով քաղաքական ուժերը ցանկանում են հնարավորինս թուլացնել կամ սպառնալիքներ հնչեցնել նախընտրական պայքարի այն բաղադրիչներին, որոնք խանգարում են հասնել իրենց քաղաքական նպատակին: Ըստ Բորիս Նավասարդյանի, նախընտրական պայքարին մասնակցող շատ քիչ քաղաքական ուժեր կան, որոնք իրենց այլ կերպ են պահում:

«Եթե այդ խանգարող բաղադրիչն այս քաղաքական պայքարում լրատվամիոջցներն են, իրենք են թիրախավորվում, եթե քաղաքական մրցակիցն է, ուրեմն նա է  թիրախավորվում, եթե որևէ հանրային, պետական կառույց է կամ հասարակական կազմակերպություն, ուրեմն իրենք են թիրախավորվում: Բոլորը, կարծես թե, ունեն իրենց թիրախները և միջոցների առումով որևէ խտրականություն չեն դրսևորում, երբ պետք է ոչնչացնել կամ վնասել այդ սուբյեկտին»,- ասել է Բորիս Նավասարդյանը:

Դիտարկմանը, որ նման հայտարարություններ է անում հենց նախկին լրագրողը, Բ. Նավասարդյանն արձագանքել է. «Նիկոլ Փաշինյանը երբեք աչքի չէր ընկնում լրագրության մեջ էթիկական կանոնները պահպանողի դերում: Այնպես որ իր գործունեությունը ոչ մի բանով չի տարբերվում այն լրատվամիջոցների գործունեությունից, որոնք մենք տեսնում ենք այսօր:

Ընդհանրապես, այն քաղաքական գործիչները, որոնք դուրս են եկել լրատվամիջոցներից, խոսքը ոչ միայն Փաշինյանի մասին է, նույնպես աչքի չեն ընկնում պարկեշտ վարքագծով, երբ մասնակցում են տարբեր քաղաքական գործընթացներում, նախընտրական մրցակցությունում»:

Բորիս Նավասարդյանի կարծիքով, Հայաստանում բոլոր իշխանությունների ներկայացուցիչներն իրենց ներդրումն ունեն նրանում, թե ինչ է այսօր իրենից ներկայացնում մեր լրատվական դաշտը:

«Լրագրողներն այս 30 տարիներին որոշակի դիմադրություն էին ցուցաբերում այն բացասական միտումներին, որոնք ներդրվում էին լրագրության մեջ, ուղղակի, բնականաբար, այն ռեսուրսները, ուժը չունեին, որպեսզի այդ դիմադրությունը էական արդյունքներ բերեր»: