կարևոր
1678 դիտում, 1 տարի առաջ - 2021-06-07 19:57

Սրանք սովորական ընտրություններ չեն, այս ընտրությունները Հայաստանի լինել-չլինելու մասին են․ ներկայացվել է «Պատիվ ունեմ» դաշինքի նախընտրական ծրագիրը

Սրանք սովորական ընտրություններ չեն, այս ընտրությունները Հայաստանի լինել-չլինելու մասին են․ ներկայացվել է «Պատիվ ունեմ» դաշինքի նախընտրական ծրագիրը

Այսօր Հայաստանի Հանրապետությունում կան իրենց ՀՀ քաղաքացի համարող ստահակներ, որոնք բացահայտ և անկաշկանդ քարոզում են հազարավոր զավակների սպանած, հայրենիքի մի հատվածը բռնազավթած, զինվորներ գերեվարված թշնամու թեզերը։ Այս մասին «Պատիվ ունեմ» դաշինքի նախընտրական քարոզարշավին ասաց դաշինքի նախընտրական ցուցակը գլխավորող Արթուր Վանեցյանը։

«Վստահե՛ք մեզ, որովհետև մենք ուժեղ ենք, արդարամիտ և խոհեմ, վստահեք եթե ուզում եք ազատել մեր երկիրը չարի լծից։ Վստահե՛ք մեզ, եթե հոգնել եք նախկին, ներկա, «սև–սպիտակ», «աջլիկ–ձախլիկ» բաժանումներից»,–ասաց նա։

«Այս ընտրությունները պետություն ունենալու և չունենալու միջև է, հայրենիքը կորցնելու և չկորցնելու միջև է»,-իր ելույթում նշեց ՀՀ երրորդ նախագահ Սերժ Սարգսյանը։

«Ես չեմ ուզում, որ իմ թոռնիկները, կամ ձեր զավակներն իրենց տանը Արարատի նկարի կողքին պատից կախեն Տաթևի վանքի, կամ Սևանա լճի պատկերները՝ որպես կորուսյալ հայրենիքի ևս մեկ հատվածի մասին պատմող հուշ»,–ասաց նա։

Սերժ Սարգսյանն ասաց, որ Հայաստանը այս դավաճանների պատճառով կորցրել է իր դաշնակիցներին, և գործընկերների հարգանքն ու վստահությունը։

«Այս պոպուլիստ և անբարո իշխանությունը լավագույնս ջանացել է միայն մեկ հարցում, որ մենք ազգովի բզկտվենք, թուլանանք, պարտվենք պատերազմում և դատապարտվենք դանդաղ մահվան»,-ասաց նա։

Նա նշեց, որ իրենց խնդիրը կրկին ներհասարակական համերաշխություն հաստատելը և բևեռացումների ճանապարհը փակելն է։

«Չկա երկու բևեռ, այս դասն արդեն բոլորը պետք է սովորած լինեն։ Մի կողմում կա դավաճան կապիտուլյանտ՝ իր սպասարկուներով, իսկ մյուս կողմում ժողովուրդ և առողջ քաղաքական դաշտի առաջատար ուժեր»,-ասաց նա։

Սերժ Սարգսյանը, դիմելով քաղաքացիներին, ասաց․ «Բոլոր նրանք, ովքեր պետականակործան տականքի դեմ պայքարի խրամատում կկանգնեն մեր կողքին այս պահից սկսած, այլ ոչ թե այն պահին, երբ կզգան մեր հաղթանակի հոտը և իրենք էլ մեր հետ կլծվեն հասարակության մոլորված մի հատվածին հետ բերելու գործին, մենք ոչ թե ներում, այլ համաներում կհայտարարենք, քանի որ հայրենիքից թանկ ոչինչ չկա։ Հակառակ դեպքում ինձ համար նրանք կմնան դասալիքներ՝ բոլոր հետևանքներով հանդերձ»,-ասաց նա։

«Այս դավաճանին ձայն տալով դուք համաձայնելու եք Արցախի, իսկ հետագայում Սյունիքի հանձնմանը, թույլ եք տալու, որ շարունակվի պատերազմը»,-նշեց Սարգսյանը՝ դիմելով այն քաղաքացիներին, որոնք դեռ չեն կողմնորոշվել ընտրության հարցում: