Փաշինյանի նախկին մամուլի խոսնակը նշանակվել է Ուկրաինայում ՀՀ արտակարգ եւ լիազոր դեսպան

ՀՀ նախագահ Արմեն Սարգսյանը հրամանագիր է ստորագրել Վլադիմիր Կարապետյանին Ուկրաինայում ՀՀ դեսպան նշանակելու մասին։

«Համաձայն Սահմանադրության 132-րդ հոդվածի 1-ին մասի 2-րդ կետի, ինչպես նաև «Դիվանագիտական ծառայության մասին» օրենքի 13-րդ հոդվածի 3-րդ մասի և 14-րդ հոդվածի.
Վլադիմիր Կարապետյանին  նշանակել Ուկրաինայում Հայաստանի Հանրապետության արտակարգ և լիազոր դեսպան` երեք տարի ժամկետով (նստավայրը՝ Կիև)»: 

Նախագահի մեկ այլ հրամանագրով այդ պաշտոնից հետ է կանչվել Տիգրան Սեյրանյանը։

Կարապետյանի դիվանագիտական կարիերան սկսվել է 1995 թվականից։ Շուրջ 10 տարի աշխատելով ՀՀ ԱԳՆ Վարդան Օսկանյանի թիմում՝  Կարապետյանը տարբեր պաշտոններ է զբաղեցրել Հայաստանի արտաքին գործերի նախարարությունում։ Մինչև 1999 թվականը նրա հիմնական գործառույթներն առնչվել են ԱՊՀ-ի հետ։ 2008 թվականի նախագահական ընտրությունների ընթացքում փետրվարի 25-ին Օսկանյանն ազատել է Կարապետյանին՝ «Դիվանագիտական ծառայության մասին» ՀՀ օրենքը խախտելու հիմնավորմամբ։

 2019 թվականի հունվարի 29-ից Վլադիմիր Կարապետյանը  եղել է Նիկոլ Փաշինյանի մամուլի խոսնակը և ազատվել է պաշտոնից մեկ տարի անց՝ 2020 թվականի հունվարին։