Մի՛ ստեք․ Գեղարքունիքում մարդիկ իրենց աչքով են տեսել, թե ինչպես են ադրբեջանցիները անարգել մտնում հայկական տարածք․ Թագուհի Թովմասյան

Երբ ես երկու շաբաթ առաջ մեր սահմանների կահավորման մասին հարց էի բարձրացնում, վարչապետի պաշտոնակատարից ստացա հեգնական պատասխան, որ ինչ պետք է, արվում է և լավ է, որ դու և ադրբեջանցիները չեք տեսնում, և հիմա լա՞վ է, որ ադրբեջանցիներն արդեն ուրիշ բաներ են տեսնում: Այս մասին այսօր Ազգային Ժողովի արտահերթ նիստում բարձրաձայնեց ԱԺ անկախ պատգամավոր Թագուհի Թովմասյանը:

«Մենք այսօր կանգնած ենք հայրենիքի կորստի առջև։ Ելույթներ շատ հնչեցին միասնական լինելու մասին։ Ո՞ւմ հետ միասնական լինենք։ Երբ իմ հայրենիքն էլի է փոքրացել, Ադրբեջանն առաջ է եկել, դուք շարունակում եք հայտարարություններ տարածել, թե պատգամավորի տված հարցի արդյունքում ադրբեջանցիները հարձակվեցին։ Լո՞ւրջ եք ասում։ Էս ինչ դիսկուրս է։ Դուք հասկանո՞ւմ եք մեր երկրի հետ ինչ է կատարվում և ինչպես կարելի է այսօրվա երկխոսությունը ծավալել այս տիրույթում։ Եթե Ադրբեջանը սա մարսեց, շատ ավելի վատ է լինելու»,- նշեց նա։

Նա ահազանգեց, որ Գեղարքունիքի մարզում չկա ռուսական ներկայացվածություն, և կոնկրետ Կութ համայնքից իրեն հայտնել են, որ քաղաքացիներն անզեն կանգնած են եղել և նայել են, թե ինչպես են ադրբեջանցիները մտնում հայկական տարածք։

Ավելի վաղ Ռազմինֆո կայքի գլխավոր խմբագիր Կարեն Վրթանեսյանը հայտնել էր, որ մայիսի 12-ին ադրբեջանցիները Գեղամասարի հատվածում խախտել էին պետական սահմանը, և սարերի ազատ տարածքներում մոտ 1-2 կմ առաջ եկել։