կարևոր
724 դիտում, 1 ամիս առաջ - 2021-05-09 15:03

«Մենք ապրելու այլ տարբերակ չունեինք». ԼՂՀ ԳԽ նախագահի պաշտոնակատար Գեորգի Պետրոսյանի առաջին հարցազրույցը՝ Շուշիի ազատագրման առիթով

«Մենք ապրելու այլ տարբերակ չունեինք». ԼՂՀ ԳԽ նախագահի պաշտոնակատար Գեորգի Պետրոսյանի առաջին հարցազրույցը՝ Շուշիի ազատագրման առիթով

«Երկիր» օրաթերթի 1992 թ. մայիսի 9-ի թիվը վաղ առավոտյան ազդարարեց կատարված հրաշքի՝ հայոց հինավուրց բերդաքաղաք Շուշիի ազատագրումը: Նույն թվի մեջ զետեղվել է նաև ԼՂՀ ԳԽ նախագահի պաշտոնակատար Գեորգի Պետրոսյանի՝ Շուշիի ազատագրման առիթով տրված առաջին հարցազրույցը: Ստորև ներկայացնում ենք այն նույնությամբ.

«Մենք այլ տարբերակ չունենք»,- ասում է ԼՂՀ ԳԽ նախագահի պաշտոնակատար Գեորգի Պետրոսյանը, որի հետ ժամը 23-ին կապնվեց մեր թղթակիցը

-Վերջին շաբաթվա ընթացքում ադրբեջանցիները լայնածավալ հարձակումներ էին գործում Ստեփանակերտի վրա: Ամեն օր զոհվում էին քաղաքի բազմաթիվ բնակիչներ: Վիճակն անտանելի էր դառնում: Եվ մայիսի 7-ին ԼՂՀ ԳԽ նախագահության նիստը պաշտպանության խորհրդից պահանջեց լռեցնել թշնամու կրակակետերը, ապ-ահովել խաղաղ բնակչության անվտանգությունը: Երեկ ԼՂՀ ինքնապաշտպանական ուժերը դիմեցին վճռական գործողությունների: Ադրբեջանի զինված ուժերի հարձակումը ամեն գնով պետք է կասեցվեր: Մենք ապրելու այլ տարբերակ չունեինք: Իրադրությունն այժմ շատ բարդ է, և մենք ամեն ինչ անելու ենք, որպեսզի Շուշին դադարի ԼՂՀ-ի հանդեպ ագրեսիայի օջախ լինելուց: Ես համոզված եմ, որ մեր գործողությունները ըմբռնումով կընկալվեն ամբողջ աշխարհում: Ես համոզված եմ, որ ողջ հայ ժողովուրդն այսօր մեր կողքին է և աջակցելու է մեզ: Աստծո և մեզ վրա է հույսներս:

Վերջում ավելացնեմ, որ Աստծո կամոք այսօր «առաջնորդի» արձանը հանվեց Ստեփանակերտի Լենինի հրապարակից: Այսուհետև այն կոչվելու է Հանրապետության հրապարակ:

«Երկիր», 9 մայիսի, 1992 թ.