կարևոր
1546 դիտում, 1 տարի առաջ - 2021-05-05 21:25

«Մենք իրավունք չունենք հերոսապատումը վերածելու ողբերգության». ԵՊՀ-ում բացվել է լրագրող ազատամարտիկներին նվիրված լսարան

«Մենք իրավունք չունենք հերոսապատումը վերածելու ողբերգության». ԵՊՀ-ում բացվել է լրագրող ազատամարտիկներին նվիրված լսարան

Երևանի պետական համալսարանի Ժուռնալիստիկայի ֆակուլտետում բացվել է ուսանող ազատամարտիկներ Սլավա Բադալյանին, Վաչագան Մանուկյանին, Աշոտ Խաչատրյանին և Նորայր Մարուքյանին նվիրված լսարան: 

Սլավա Բադալյանը, Վաչագան Մանուկյանն ու Աշոտ Խաչատրյանը զոհվել են Արցախյան երկրորդ, իսկ Նորայր Մարուքյանն` Արցախյան առաջին պատերազմի ընթացքում:

«Նորայրը, Վաչագանը, Սլավան և Աշոտը տարբեր էին իրենց էությամբ, բնույթով ու բնավորությամբ, բայց նույնն էր նրանց երազանքը՝ կառուցել հզոր երկիր, ունենալ հզոր բանակ և երջանիկ ժողովուրդ: Սերունդներ են մտնելու համալսարան ու դուրս են գալու այս տաճարից մաքրագործված՝ որպես նվիրյալ զավակներ իրենց հողի ու հայրենիքի: Սերունդները հաջորդելու են միմյանց՝ իրենց թիկունքում զգալով սրբալույս տղաների գոտեպնդող և ոգի տվող հայացքները: Երևանի պետական համալսարանը տաճար է. աղոթենք, որ այս տաճարում նման սրբապատկերների թիվը երբևէ չավելանա »,- նշել է Ժուռնալիստիկայի ֆակուլտետի դեկան Նաղաշ Մարտիրոսյանը:

Անմահացած ազատամարտիկներին նվիրված լսարանի բացմանը ներկա են գտնվել Տավուշի թեմի առաջնորդ գերաշնորհ Տեր Բագրատ եպիսկոպոս Գալստյանը, ազատամարտիկ հերոսների ծնողները, ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը, ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանը, ֆակուլտետի դասախոսներ և ուսանողներ:

Սլավա Բադալյանի քույրը՝ Վիկտորյա Բադալյանը, մեջբերեց եղբոր՝ հայրենասիրությանը  վերաբերող խոսքերից մեկը, ըստ որի՝ հայրենիքը մարդիկ են, իսկ հայրենասիրությունը՝ մեզ տրված առաքելություն, որը մեծ սիրով և արժանապատվությամբ պետք է կատարենք:

«Սլավն իր անելիքը մինչև վերջ կատարեց: Խոցեց թշնամու տանկն ու անմահացավ: Ես խոստացել եմ նրան, որ շարունակելու եմ իր գործը, դառնալու եմ լավ լրագրող, ինչպես ինքն էր ցանկանում»,- ասաց Վիկտորյան և եղբոր անունից շնորհակալություն հայտնեց  Ժուռնալիստիկայի ֆակուլտետի դասախոսական կազմին՝ տված գիտելիքների ու մարդկային լավագույն հատկանիշների ձեռքբերման համար: