ՀՀ պետական լրատվականը ներկայացնում է Բաքվի թեզը, թե տարածքային հավակնություններ չունի՝ անտեսելով Ալիևի սադրիչ հայտարարությունը Զանգեզուր ու Երևան հասնելու մասին

Իլհամ Ալիեւը համալսարանում տեղի ունեցած գիտաժողովի ժամանակ չնայած հայտարարել է, թե իբր Ադրբեջանը Հայաստանի նկատմամբ տարածքային պահանջներ չունի, սակայն, խոսել է Զանգեզուրի մասին՝ այն ներկայացնելով, որպես Ադրբեջանի պատմական տարածք:

Նրա խոսքով՝ ադրբեջանական է նաեւ Սեւանա լճի տարածքը եւ անգամ Երեւանը: «Ադրբեջանցիները, այդ թվում իմ նախնիները, ապրել են այնտեղ»,- ասել է Ալիեւը՝ հավելելով, որ այնտեղ անպայման կվերադառնան:

Նրա խոսքով, սակայն, վերադարձը չի լինի տանկերով: ««Այո, մենք կվերադառնանք այնտեղ: Ես չեմ ասել, որ մենք տանկերով կվերադառնանք: Եթե վերադառնում ենք Զանգեզուրի միջանցք, եթե օգտվելու ենք այս ճանապարհից, ապա ինչու՞  չվերադառնանք Երեւան: Ժամանակը կգա, մենք կանենք դա», - ասել է Ալիեւը:

Հատկանշական է, որ հայկական պետական «Արմենպրես» գործակալությունը համատեքստից դուրս վերցրել է Ալիեւի ելույթի միայն մի հատվածը և առաջ տարել Բաքվի այն թեզը, թե «Ադրբեջանը Հայաստանից տարածքային պահանջներ չունի», ըստ էության՝ անտեսելով ելութի մյուս՝ առավել հավակնոտ, հայկական պետականության և Հաայստանի տարածքների հանդեպ ադրբեջանական նկրտումները հաստատող բարձրագոչ հատվածները: