կարևոր
875 դիտում, 9 ամիս առաջ - 2021-04-05 14:02

Իմքայլական պատգամավորի լիազորությունները դադարեցված են. Սուրեն Գրիգորյանը, ամենայն հավանականությամբ, գործադիրում պաշտոն կստանա

Իմքայլական պատգամավորի լիազորությունները դադարեցված են. Սուրեն Գրիգորյանը, ամենայն հավանականությամբ, գործադիրում պաշտոն կստանա

Ազգային ժողովի «Իմ քայլը» կուսակցությունների դաշինքի համապետական ընտրական ցուցակով ընտրված պատգամավոր Սուրեն Գրիգորյանի պատգամավորի լիազորությունները դադարեցված են: ԱԺ նախագահ Արարատ Միրզոյանը ստորագրել է արձանագրություն՝ հիմք ընդունելով մարտի 29-ին Սուրեն Գրիգորյանի ներկայացրած հրաժարականի դիմումը: 

«Հիմք ընդունելով պատգամավորի հրաժարականի մասին դիմումը և առաջնորդվելով «Ազգային ժողովի կանոնակարգ» սահմանադրական օրենքի 154-րդ հոդվածի 1-ին մասի 6-րդ կետի պահանջով՝ դադարած համարել «Իմ քայլը» կուսակցությունների դաշինքի համապետական ընտրական ցուցակով ընտրված պատգամավոր Սուրեն Գրիգորյանի՝ պատգամավորի լիազորությունները», - նշված է ԱԺ նախագահի արձանագրության մեջ:

Սուրեն Գրիգորյանը ֆեյսբուքյան իր էջում հայտնել է պատգամավորական գործունեության դադարեցման մասին։

Ըստ շրջանառվող լուրերի՝  Սուրեն Գրիգորյանի կողմից մանդատը վայր դնելը պայմանավորված է գործադիր մարմնում աշխատանքի անցնելու առաջարկով: