կարևոր
1957 դիտում, 1 տարի առաջ - 2021-03-28 00:21

Շաբաթը ուրբաթից շուտ եկավ, ու այդ «նախաձեռնությունը» փաստորեն պաշտոնական Երևանից հնչեց. Հրանտ Մելիք-Շահնազարյան

Շաբաթը ուրբաթից շուտ եկավ, ու այդ «նախաձեռնությունը» փաստորեն պաշտոնական Երևանից հնչեց. Հրանտ Մելիք-Շահնազարյան

Ամեն դեպքում պարզ է, որ Հայաստանի համար կործանարար այս ընթացքը կասեցնելու միայն մեկ ուղի կա՝ դավաճան իշխանությունների հեռացումը։ Քանի Նիկոլն է վարչապետ, ամեն ինչ էլ սպասելի է,- գրում է քաղաքագետ Հրանտ Մելիք-Շահնազարյանը՝ անդրադառնալով ՀՀ Անվտանգության խորհրդի քարտուղարի հնչեցրած հայտարարությանը: 

Հանրային հեռուստաընկերության եթերում, պատասխանելով հարցին՝ մենք Թուրքիային համարու՞մ ենք թշնամի պետություն, Արմեն Գրիգորյանն ասաց.
«Ես ասացի, որ տարածաշրջանում շատ բաներ են փոխվել։ Եթե մենք գնում ենք տարածաշրջանի ապաշրջափակմանը՝ ապա մեր մոտեցումներում որոշակի շտկումներ պետք է լինեն և մենք այդ ուղղությամբ աշխատում ենք»։
Դիտարկմանը, որ պատերազմի ժամանակ մենք տեսանք, թե թուրքերը ինչպես օգնեցին Ադրբեջանին, հիմա մենք Թուրքիային համարո՞ւմ ենք թշնամի պետություն, Արմեն Գրիգորյանը պատասխանեց. «Միանշանակ պնդել, որ որևէ վտանգ չի գալիս Թուրքիայից սխալ կլինի, բայց ընդհանուր տարածաշրջանում ընթացող գործընթացները նաև այլ հնարավորություններ են տալիս»։

Հրանտ Մելիք-Շահնազարյանը մատնանշում է, թե որտեղից են գալիս նման հայտարարությունները.

««Արդարություն և զարգացում» կուսակցության՝ երկու օր առաջ տեղի ունեցած համագումարի ընթացքում Թուրքիայի նախագահ Էրդողանը հայտարարել է, որ իր երկիրը «մեծացնելու է բարեկամների թիվը»։ Երեկ, երբ կարդացի այդ լուրը, մտքինս առաջինը հենց դա եկավ՝ մտածեցի, թե ինչ փիար կաներ ինքն իր համար Էրդողանը, եթե կարողանար Ապրիլի 24-ին ընդառաջ հայտարարել, որ Հայոց ցեղասպանության հարցն էլ է տեղավորում Հայաստանի կապիտուլյացիայից հետո մեզ պարտադրվող փաթեթում։ Իսկ եթե այս իշխանություններից մեկն էլ գոնե չհերքեր այդ հայտարարությունը, ամեն ինչ հրաշալի կլիներ Թուրքիայի ու Էրդողանի համար։ Բայց արի ու տես, որ շաբաթը ուրբաթից շուտ եկավ ու այդ «նախաձեռնությունը» փաստորեն պաշտոնական Երևանից հնչեց։

Ես հիմա հասկանում եմ մարդկանց դժգոհությունն ու վրդովմունքը ԱԽ քարտուղարի՝ Թուրքիայի հետ հարաբերությունները վերանայելու մասին հայտարարության կապակցությամբ, բայց կրկին ուզում եմ փաստել, որ դա էլ օրինաչափ է։ Այսօր ցերեկն արդեն առիթ ունեցել եմ գրելու, որ նույն Արմեն Գրիգորյանը երկու օր առաջ գրեթե բաց տեքստով է հայտարարել այն մասին, որ պատերազմը մինչ Շուշիի հանձնումը դադարեցնելու Պուտինի առաջարկը թուրքական կողմը փաստորեն Նիկոլի շուրթերով է մերժել։ Դե հիմա էլ մնացածն են ուզում։ Չեմ բացառում անգամ, որ Էրդողանն ու Ալիևը Նիկոլից պահանջեն ապրիլի 24-ին բացել հայ-թուրքական սահմանը»,- նշում է քաղաքագետը և հավելում, որ Հայաստանի համար կործանարար այս ընթացքը կասեցնելու միայն մեկ ուղի կա՝ դավաճան իշխանությունների հեռացումը: