կարևոր
1360 դիտում, 1 տարի առաջ - 2021-03-22 16:54

Հրանտ Մաթևոսյանի որդին հրաժարվեց Կառավարության հետ «Հրանտ Մաթևոսյան» կենտրոնի գործարկման շուրջ անարդյունավետ բանակցություններից

«Հրանտ Մաթևոսյան» հիմնադրամի տնօրեն, արձակագրի որդի Դավիթ Մաթևոսյանը մարտի 21-ին ՀՀ կառավարությանն ուղղված պաշտոնական գրությամբ հրաժարվեց «Հրանտ Մաթևոսյան» կենտրոնի կառուցման, կահավորման և գործարկման, իր խոսքերով, անարդյունավետ բանակցություններից.

«Պաշտոնական գրությամբ հրաժարվեցինք «Հրանտ Մաթևոսյան կենտրոն»-ի կառուցման, կահավորման և գործարկման անարդյունավետ բանակցություններից. 2018-ից առ այսօր, չնայած մեր բոլոր ջանքերին, առաջարկներին, պնդումների և հորդորներին, չնայած ժամանակ առ ժամանակ կայծկլտացող թվացյալ առաջխաղացումներին, որ ՀՀ կառավարության դիրքորոշումների և կարծիքների մեջ տրամաբանության մանանեխահատիկներ էին թվում, ոչինչ-ոչինչ-ոչինչ չի փոխվել և չի փոխվի:

Ես այստեղ ու այսուհետև դիմում եմ և դիմելու եմ բացառապես մարդկանց ու հանրությանը, բացառապես ոչ կառավարական կազմակերպություններին, գործարարներին` բոլորին, որ մշակույթի ու բանի ու Հրանտի արժեքն ու դերը հասկանում են. մեր կենտրոնը կառուցելու ենք-ավարտենք ու գործարկենք այդպես, այդ ֆինանսավորմամբ: Առաջ. կառուցում ենք մեր Կենտրոնը», - ասված է Դավիթ Մաթևոսյանի հայտարարության մեջ։