Բախտը մեկն է զինվորի` կամ մահ, կամ ազատություն. Բժշկականում նշել են ՀՅԴ ուսանողական միության անդամ, հայրենիքի նահատակ Կիմ Խաչատրյանի ծննդյան օրը

Այսօր Երևանի Պետական Բժշկական Համալսարանում տեղի ունեցավ ՀՅԴ «Նիկոլ Աղբալյան» ուսանողական միության անդամ, Հայկական բժշկական համալսարանի 5-րդ կուրսի ուսանող Կիմ Խաչատրյանի ծննդյան օրվան նվիրված հուշ-երեկո։ Պատերազմի առաջին իսկ օրերին ՀՅԴ «Նիկոլ Աղբալյան» ուսանողական միության իր ընկերների հետ ՀՅԴ կամավորական ջոկատի կազմում մեկնեց առաջնագիծ։ Զոհվեց հոկտեմբերի 31-ին։ 

Կիմի մայրը՝ Նարինե Միքայելյանը իր խոսքում, վերհիշեց, դեռ նոր տառաճանանչ դարձած, Կիմի խոստումը. «Եթե մի օր որոշենք Մասիս սարը հետ բերել, ես կմիանամ մեր զինվորներին»: Կիմը հավատարիմ մնաց իր խոստմանը, կյանքը չխնայելով հանուն հայրենիքի։

Մեր խոստումն է հավատարիմ մնալ՝ Կիմին և նրա գաղափարին։

«Կիմին հայրենասիրությունը փոխանցվել է ոչ թե դաստիարակության, այլ գենի միջոցով: Նա առանց վայրկյան մտածելու կամավորագրվել է հայրենիքի պաշտպանության գործին՝ «ով, եթե ոչ ես» խոսքերը շուրթերին»,- ասել է հերոսի մայրը՝ Նարինե Միքայելյանը, շեշտելով, որ որդին զինվորագրվել և պատերազմ է գնացել դրոշները ձեռքին ծածանելով, ավա՛ղ, ափսո՛ս, վերադառնալով դրոշն իր վրա կրելով՝ միացել է հանուն հայրենիքի նահատակված քաջ հայորդիներին:

ԵՊԲՀ ռեկտոր Արմեն Մուրադյանի խոսքով՝ անմահացած հերացիականները հայրենասիրության, մարդասիրության և գթասրտության օրինակ են: Նրանք բժշկի այն կերպարներն են, որոնք պատրաստ են մարտի դաշտում պաշտպանել հայրենիքն ու ազգի արժանապատվությունը, միևնույն ժամանակ հավատարիմ մնալ ամենամարդասիրական մասնագիտությանը՝ բժշկի կոչմանը:

Ստոմատոլոգիական ֆակուլտետի դեկան Լազար Եսայանի բնորոշմամբ՝ դասախոսների և ընկերների կողմից սիրված Կիմը հայրենասիրության իրական կերպար էր: Նա ռազմաճակատ մեկնեց հայրենիքի նկատմամբ պարտքի մղումով: «Բոլորս խոնարհվում ենք անմահացած հերոսի հիշատակի և ընտանիքի առաջ»,-նշել է դեկանը:

Շնորհալի, կյանքում ազգային արժեքներով ու ավանդույթներով առաջնորդվող, հայրենիքն անսահման սիրող Կիմը ծնվել է 1995 թ. մարտի 17 ին՝ Վայոց Ձորի մարզի Արենի գյուղում, 2001-2012 թթ. սովորել և ավարտել է Արենիի միջնակարգ դպրոցը։ 2013-2015 թթ. ծառայել ՀՀ զինված ուժերում (Մեղրիում)։ Նպատակ ուներ ուսումն ավարտելուց հետո մասնագիտական գործունեությունը ծավալել հայրենի գյուղում, հիմնել  ատամնաբուժարան։

Հոկտեմբերի 5-ին՝ ուսուցչի օրը, Կիմը հրապարակել էր ուսուցչի հետ իր լուսանկարը և գրել. «Ուսուցչի օրը... Իմ կյանքին սթափ նայելու ու հայրենիքի հանդեպ պարտքի զգացում սերմանած ուսուցիչ։ Քո դասերից է, որ հիմա ամաչում եմ քաղաքացիական հագուստով ման գալ»: Իսկ ռազմաճակատ մեկնելու օրը Կիմը սոցցանցի իր էջում հրապարակել էր հետևյալ բանաստեղծությունը. 

Բախտը մեկն է զինվորի` Կամ մահ, կամ ազատություն։

Կիմ Խաչատրյանի հիշտակին նվիրված հուշ-երեկոյի ընթացքում ամփոփվել են նաև ԵՊԲՀ ուսանողական խորհրդարանի կողմից հերոսի պատվին անցկացվող զենքի քանդման և հավաքման, կրակային պատրաստության միջֆակուլտետային մրցույթների արդյունքները, որին մասնակցելու համար դիմել էին մեծ թվով ապագա բժիշկներ: Մասնակիցները ստացել են պատվոգրեր, իսկ հաղթողներն՝ արժանացել մրցանակների: