Քաղաքացիները եւ փաստաբանները պահանջում են նախագահից ԳՇ պետին ազատելու առաջարկն ուղարկել ՍԴ

Քիչ առաջ  մի շարք քաղաքացիներ եւ փաստաբաններ, Փաստաբանների պալատի նախագահ Արա Զոհրաբյանի գլխավորությամբ, նախագահական նստավայրի դիմաց ակցիա էին իրականացնում:

Նրանք պահանջում էին, որ Արմեն Սարգսյանը դիմի ՍԴ՝ ԳՇ պետին ազատելու վերաբերյալ առաջարկը Սահմանադրությանը հակասող ճանաչելու պահանջով:

Ակցիայի մասնակիցները գրավոր պահանջ են ներկայացնում նախագահին՝ խնդրելով այսօր դիմել Սահմանադրական դատարան՝ Օնիկ Գասպարյանին ազատելու վերաբերյալ վարչապետի առաջարկությունը սահմանադրությանը հակասող ճանաչելու պահանջով:

«Եթե նախագահն այսօր չդիմեց ՍԴ, մենք՝ նախաձեռնողներս, անպայման փորձելու ենք բացահայտել նախագահի վախերը՝ ինչից ելնելով է նա վախենում վարչապետից, ինչն է խնդիրը, որ նախագահը փոխեց իր կեցվածքը, արդյոք իրենից կրկին քաղաքացիության մասին փաստաթուղթ ուզեցին»,- ասել է Փաստաբանների պալատի նախագահը:

Նրանք նախապես հայտարարություն էին տարածել՝ նշելով, որ Սահմանադրությամբ նախագահին տրված է Սահմանադրության պահպանմանը հետեւելու պարտականություն: Նախագահն իր լիազորություններն իրականացնելիս անաչառ է եւ առաջնորդվում է բացառապես համապետական եւ համազգային շահերով: