կարևոր
1178 դիտում, 1 տարի առաջ - 2021-02-22 13:17

Փարիզում տեղի է ունեցել Միսակ Մանուշյանի ոգեկոչման միջոցառումը

Փարիզում տեղի է ունեցել Միսակ Մանուշյանի ոգեկոչման միջոցառումը

Փետրվարի 21-ին ՀՀ դեսպանությունը մասնակցեց Երկրորդ համաշխարհայինի ընթացքում Ֆրանսիայի ազատագրման «Դիմադրություն» շարժման հայազգի ականավոր ներկայացուցիչ Միսակ Մանուշյանին և նրա զինակիցներին նվիրված հիշատակի ամենամյա միջոցառմանը:

Ֆրանսիայում ՀՀ դեսպանության հաղորդմամբ, միջոցառումն ավանդաբար տեղի է ունենում Փարիզի 20-րդ թաղամասում Մանուշյանի անունը կրող փողոցում, ուր վեր է խոյանում Մանուշյանի և նրա խմբի անդամների վիթխարի որմնանկարը և զետեղված են նրանց սխրանքն անմահացնող հուշատախտակները։ 

«Խորին շնորհակալություն և գնահատանք Փարիզի 20-րդ թաղամասի ղեկավար Էրիկ Պլիեզին, ավագանու անդամներին, չնայած սանիտարական սահմանափակումներին, Մանուշյանականների հիշատակի ամենամյա ոգեկոչման ավանդույթը պահպանելու և այս տարի ևս այն պատշաճորեն կյանքի կոչելու համար։ Շնորհակալություն նաև Փարիզի ավագանու անդամներին, խորհրդարանականներին միջոցառմանը մասնակցելու և հարգանքի տուրք մատուցելու համար։ Արյունով հայ, իսկ թափված արյունով՝ ֆրանսիացի Միսակ Մանուշյանի, ինչպես նաև նրա խմբի անդամների դաժան վախճանից 77 տարի անց նրանց անձնուրաց պայքարը՝ հանուն ազատության և համամարդկային արժեքների, այսօր էլ արդիական է և ներշնչում է սերունդներին։ Մանուշյանի ազատատենչ և ինքնազոհ ոգին սնուցվում է հայ ժողովրդի արդար մաքառումից և այսօր էլ թևածում է հայրենյանց երկնքում մեր անմահ տղաների կողքին։ Հավերժ փառք և խոնարհում մեր հերոսների սխրանքին և առ հայրենիք նրանց սիրուն», նշվում է դեսպանության հաղորդագրության մեջ։