կարևոր
1457 դիտում, 1 տարի առաջ - 2021-02-19 22:49

Անհայտ է, թե ես և Անժելա Էլիբեգովան ինչու ենք ԱԱԾ-ում եղել. Գոհար Մելոյան

Անհայտ է, թե ես և Անժելա Էլիբեգովան ինչու ենք ԱԱԾ-ում եղել. Գոհար Մելոյան

Ինձ համար այս պահին անհայտ է, թե ես կամ Անժելա Էլիբեգովան ինչպես կարող ենք ընդհանրապես այս շենքում հայտնվել: Այս մասին ԱԱԾ-ի մոտ լրագրողների հետ զրույցում ասաց սահմանդրագետ Գոհար Մելոյանը:

Հիշեցնենք, որ նա և Ադրբեջանի հարցերով փորձագետ Անժելա Էլիբեգովան բերման էին ենթարկվել ԱԱԾ:

««Պառլամենտարիզի զարգացման միջազգային կենտրոն» ՀԿ-ում, որտեղ մենք աշխատում ենք, քննչական գործողություն է տեղի ունեցել, խուզարկություն: Համապատասխան իրավապահ մարմնի ներկայացուցիչները հրաժարվեցին ինձ ներկայացնել որոշումը, ինչպես հասկացա՝ այն դատարանի որոշում չէր: Քանի որ չեմ ծանոթացել որոշմանը, չեմ կարող ասել՝ կոնկրետ ինչ գործի շրջանակում էր իրականացվում խուզարկությունը: Մի շարք առգրավված անձնական իրեր կան: Ամբողջովին ուսումնասիրվեցին առկա հաստափոր թղթապանակները, որտեղ մեծամասամբ իրենց հետաքրքրող նյութ չկար: Համակարգիչներ են առգրավել»,-ասաց Գոհար Մելոյանը՝ նշելով, թե պատահական ժամանել է աշխատավայր ու հայտնաբերել, որ քննչական գործողություն է ընթանում:

«Անհասկանալի է նաև կարգավիճակը գործի շրջանակներում: Հարցաքննվել ենք կասկածյալի հիմքով, հրաժարվել ենք ցուցմունք տալուց, քանի որ հստակեցված չէր գործերի շրջանակը»,-նշեց Մելոյանը:

Անժելա Էլիբեգովան ևս նշեց, թե չգիտի՝ ինչու է եղել ԱԱԾ-ում: «Ես բացարձակ գաղափար չունեմ՝ ինչ է կատարվում իմ շուրջ, ինչու եմ հայտնվել ԱԱԾ շենքում, առգրավված են իմ հեռախոսն ու աշխատանքային համակարգիչը: Համակարգչում կա շատ կարևոր աշխատանքային ինֆորմացիա, այդ թվում՝ Ադրբեջանի ռազմական հանցագործութունների վերաբերյալ, որոնք պետք է փոխանցեի ՄԻՊ-ին»,-ասաց նա: