կարևոր
1114 դիտում, 1 տարի առաջ - 2021-02-17 13:37

Խնձորեսկն ու Քարահունջն ամենայն հավանականությամբ կներառվեն սոցիալական աջակցության ցանկում․ փոխնախարար

Խնձորեսկն ու Քարահունջն ամենայն հավանականությամբ կներառվեն սոցիալական աջակցության ցանկում․ փոխնախարար

Սահմանամերձ բնակավայրերին սոցիալական աջակցության ծրագրում Խնձորեսկի և Քարահունջի ներգրավված չլինելը տեխնիկական վրիպակ չէ, սակայն հարցը կվերանայվի և ամենայն հավանականությամբ նրանք նույնպես կներառվեն ցանկում։ Այս մասին մամուլի ասուլիսի ժամանակ ասել է ՀՀ աշխատանքի և սոցիալական հարցերի փոխնախարար Դավիթ Խաչատրյանը:

Նա նշել է, որ գործում է սահմանից ուղիղ հեռավորության որոշակի մեթոդաբանություն․ «Հեռավորությունը չափվում է սահմանից մինչև այդ բնակավայրի վերջին բնակելի տուն։ Խնձորեսկն ու Քարահունջն ավելին էին, քան այդ տարածությունն է»,-ասել է փոխնախարարը։

Վերջինս, սակայն, նշել է, որ ահազանգերից հասկանալի է դարձել, որ այդ բնակավայրերում գյուղատնտեսական նշանակության հողատարածքները մոտ են սահմանին և գյուղատնտեսական աշխատանքներ իրականացնելու համար բավականին ռիսկային է․

«Քննարկում ենք այս ցանկը ճշգրտելու տարբերակները։ Կլինեն վերանայումներ, Խնձորեսկն ու Քարահունջն ամենայն հավանականությամբ կընդգրկվեն այս ցանկում։ Օրերի ընթացքում ցանկը կճշգրտվի և փոփոխություն կկատարվի»,-նշել է Դավիթ Խաչատրյանը։

Հարցին, թե Գեղարքունիքի և Սյունիքի 39 բնակավայրերում քանի շահառու է օգտվելու ծրագրերից, փոխնախարարը նշել է, որ մինչ այս գործող 38 բնակավայրերում ապրում է 63 հազար քաղաքացի, իսկ ավելացված ցուցակում քաղաքացիների թիվը կազմում է մոտ 14 հազար և բոլորն էլ էլեկտրաէներգիայի, գազի մասով պոտենցիալ շահառուներ են և կընդրկվեն աջակցություն ստացող քաղաքացիների ցանկում:

Հիշեցնենք, որ Գորիսի համայնքի ղեկավարի տեղակալ Իրինա Յոլյանը երեկ ֆեյսբուքյան իր էջում գրառում էր կատարել՝ անդրադառնալով սահմանամերձ համայնքներին տրվող սոցիալական աջակցության ծրագրին, որից դուրս էին մնացել Խնձորեսկ և Քարահունջ բնակավայրերը: