կարևոր
975 դիտում, 9 ամիս առաջ - 2021-02-15 17:59

ԱԱԾ-ն պատասխանում է, թե ձերբակալված ադրբեջանցի զինծառայողները մոլորվել էին, իսկ վերադարձվել են, քանի որ նախադեպ ենք ունեցել

ԱԱԾ-ն պատասխանում է, թե ձերբակալված ադրբեջանցի զինծառայողները մոլորվել էին, իսկ վերադարձվել են, քանի որ նախադեպ ենք ունեցել

Այսօր ԱԱԾ-ից ստացվել է Երկիր Մեդիա հեռուստաընկերության կողմից ուղարկված տեղեկություն ստանալու հարցման պատասխանը, որը վերաբերում էր 2021 թվականի հունվարի 30-ին Հայաստանի ազգային անվտանգության ծառայության կողմից Սյունիքի մարզի Տեղ բնակավայրի շրջանում 2 ադրբեջանցու ձերբակալման և նրանց ազատմանը: 

Ի պատասխան Երկիր Մեդիա հեռուստաընկերության՝ փետրվարի 9-ի տեղեկություն ստանալու հարցմանը, ԱԱԾ-ն պարզաբանել է.

«Նշված անձինք ՀՀ տարածքում են հայտնվել եղանակային պայմանների պատճառով մոլորվելու արդյունքում և նրանց վերաբերյալ համապատասխան որոշումը կայացվել է ՌԴ խաղաղապահների հետ համակողմանի քննարկումների արդյունքում՝ նկատի ունենալով նաև հայկական կողմից ևս նմանատիպ դեպք ունենալու և փոխադարձ համաձայնությամբ, նույն ընթացակարգով հարցի լուծման նախադեպը»: 

Հիշեցնենք, ինչպես հայտնի դարձավ փետրվարի 1-ին ՌԴ ՊՆ հրապարակած տեղեկագրից, ռուսական խաղաղապահ զորախմբի հրամանատարության միջնորդությամբ ազատ էին արձակվել Ադրբեջանի զինված ուժերի երկու զինծառայող, որոնք ձերբակալվել էին 2021 թվականի հունվարի 30-ին Հայաստանի ազգային անվտանգության ծառայության կողմից Սյունիքի մարզի Տեղ բնակավայրի շրջանում: 

Հավելենք, որ այս մասին մինչ օրս ՀՀ Ազգային անվտանգության ծառայությունը պաշտոնական որևէ հաղորդագրություն չի հրապարակել: ԱԱԾ հաղորդագրություններում չգտանք նաև այս պատասխանում նշված «հայկական կողմից ևս նմանատիպ դեպք ունենալու նախադեպի» մասին որևէ հաղորդագրություն: 

Երկիր մեդիա հեռուստաընկերությունը հետևյալ հարցերն էր ուղղել ԱԱԾ-ին. 

  1. ՀՀ ԱԱԾ արդյոք հրապարակե՞լ է 2020թ.-ի հունվարի 30-ին Սյունիքում ադրբեջանցի զինծառայողներին ձերբակալելու մասին տեղեկությունը: Եթե այո, ապա խնդրում ենք տրամադրել համապատասխան աղբյուրը՝ ակտիվ հղմամբ կամ տպագիր աղբյուրի պատճեն:
  2. Ի՞նչ հիմքով կամ կասկածանքով են ադրբեջանցի երկու զինծառայողները ձերբակալվել, ի՞նչ մեղադրանք է նրանց նկատմամբ առաջադրվել:
  3. Ձերբակալումից հետո ի՞նչ կարգավիճակ են նրանք ստացել և որտե՞ղ են պահվել:
  4. Ի՞նչ կարգավիճակով են նրանք ետ վերադարձվել ադրբեջանական կողմին՝ որպես գերի՞, թե՞ մեկ այլ:
  5. Ադրբեջանցի 2 զինծառայողի հանձնումը հայկական կողմի համար առանց պայմանների է եղե՞լ, թե՞ գործել է բոլորը բոլորի դիմաց սկզբունքը: Հայկական կողմը երկու ադրբեջանցու հանձնման դիմաց վերադարձրե՞լ է հայ գերի: Եթե այո՝ ապա քանիսի՞ն և ե՞րբ:

Մյուս խումբ հարցերը վերաբերում էին ՌԴ ՊՆ տեղեկագրում նշված վատառողջ 16 ադրբեջանցի զինծառայողների տեղափոխմանը, որին ի պատասխան տրվել է հետևյալ պարզաբանումը. 

«Ադրբեջանի զինված ուժերի վատառողջ զինվորականները, անվտանգության նկատառումներով պայմանավորված, ՌԴ խաղաղապահների ուղեկցությամբ տեղափոխվել են Ադրբեջանի Հանրապետության վերահսկողության տակ գտնվող մեկ տարածքից դեպի մեկ այլ տարածք: Նրանք որևէ կարգավիճակով ՀՀ տարածքում չեն գտնվել»: