Արժանապատվություն ունեցող յուրաքանչյուր քաղաքացի պետք է իր բողոքն արտահայտի սրա դեմ. Գեղամ Մանուկյան

Հերթական անգամ Ազգային ժողովում փորձում են հապշտապ սահմանադրական օրենքների փոփոխություն իրականացնել՝ ձևախեղում են դատական համակարգը, հատուկ կարգ են մտցնում, նոր դատավորների նշանակման հարց ունեն: Այս մասին հայտարարեց ՀՅԴ անդամ Գեղամ Մանուկյանը Աժ մոտ իրականացվող բողոքի ակցիայի ժամանակ: 

Հայրենիքի փրկության շարժումը երեկ հայտարարեց, որ նիստի օրակարգում ընդգրված են հակապետական օրինագծեր ու կոչ արեց քաղաքացիներին հավաքվել Ազգային ժողովի շենքի դիմաց և բողոքի ձայնը բարձրացնելու ապազգային իշխանության գործունեության դեմ: Վաղ առավոտից քաղաքացիները հավաքվել են Ազգային ժողովի շենքի մոտ՝ ի նշան բողոքի:

ԱԺ-ն արտահերթ նիստ է հրավիրել դատական օրենսգրքում փոփոխությունների նախագծի փաթեթը քննարկելու համար: Նախագծով առաջարկվում է ստեղծել առանձին դատարաններ, որոնց վերապահվելու է մինչդատական վարույթի քրեական գործերով միջնորդությունների և կոռուպցիոն հանցագործությունների քննությունը: 

«Վերջին շրջանում ականատես եղանք, որ ցանկացած քննադատական կարծիք արտահայտողին մեկուսացնելու և բանտարկելու՝ իշխանության կույր տենչանքին շատ դատավորներ դեմ են արտահայտվում: Եվ հիմա իշխանությունը որոշեց՝ չեք կալանավորում, օրենքը կփոխենք: Այս Ազգային ժողովը իր գործունեության ամբողջ ընթացքում գործել է մի տրամաբանությամբ. որ օրենքն իրենց խանգարում է իրենց անօրինականությունները գործի դնելուն, իրենք ուղղակի օրենք են փոխում: Հիշեք մեկ տարի առաջ ուղիղ այս օրերին ինչ փոփոխություններով էր զբաղված իշխանությունը. երկրի բոլոր կարևոր հիմնախնդիրները թողած՝ իրենց քիմքին հաճո Սահմանադրական դատարան էին ուզում ձևավորել»,- հայտարարեց Գեղամ Մանուկյանը: 

Նա նշեց, որ այսօրվա բողոքի գործողությունը նաև ուղղված է այս շենքում հավաքված պատգամավորների ճնշող մեծամասնությանը: «Այստեղ հավաքված յուրաքանչյուր անձ գիտակցում է, որ այս շենքում հավաքված պատգամավորների խումբը, որն ունի իմ քայլը անունով ցուցանակ, ամեն օր խայտառակում է մեր ժողովրդին, մեր երկիրն ու հայության քաղաքական միտքը: Օր չկա որ իմ քայլի որևէ պատգամավոր հիմարություն դուրս չտա, խայտառակ արտահայտություն չանի, հերթական անգամ վտանգի տակ չդնի մեր անվտանգությունը: 

Սա միայն Հայրենիքի փրկության շարժման խնդիրը չէ, արժանապատվություն ունեցող յուրաքանչյուր քաղաքացի պետք է իր բողոքն արտահայտի սրա դեմ»,- ասաց Գեղամ Մանուկյանը: