444 դիտում, 2021.01.25 18:03

Պատգամավորը դիմել է ՀՀ ԱԳ նախարարին՝ լուծման հանձնարարական տալ Մառնեուլում հայկական բեռնատարների վրա ադրբեջանցիների հարձակման առիթով

Պատգամավորը դիմել է ՀՀ ԱԳ նախարարին՝ լուծման հանձնարարական տալ Մառնեուլում հայկական բեռնատարների վրա ադրբեջանցիների հարձակման առիթով

Վրաստանի հանրապետության Մառնեուլի, Ռուսթավիի շրջանում գտնվող մի շարք բեռնատարների հայ վարորդների ահազանգի հետքերով քիչ առաջ դիմեցի ՀՀ արտաքին գործերի նախարար Արա Այվազյանին: Այս մասին ֆեյսբուքյան իր էջում գրել է ԱԺ պատգամավոր Թագուհի Թովմասյանը։

«Ցավոք սրտի տհաճ եւ վտանգավոր միջադեպ է գրանցվել. ըստ ամենայնի Մառնեուլի բնակիչ ադրբեջանցիները քարերով հարվածել են հայկական համարանիշներով ավտոմեքենանեին, կոտրել որոշների ապակիները եւ, վարորդների պնդմամբ, խոչընդոտներ են հարուցել տեղաշարժվելու հարցում: Խոսքը մոտ տասնյակ բեռնատարների մասին է:

Նախարարին խնդրել եմ բարձրացված հարցի օպերատիվ լուծման հանձնարարական՝ հայկական համարներով ավտոմեքենաների անվնաս Հայաստան գալու համար: Հուսանք՝ Վրաստանի իշխանություններն անպատիժ չեն թողնի այս հանցագործությունը»,-գրել է պատգամավորը:

Հիշեցնենք, որ Թագուհի Թովմասյանը նոյեմբերի 16-ին ներկայացրել էր ԱԺ «Իմ քայլը» խմբակցությունից դուրս գալու դիմում, և նշել, որ իրենց քաղաքական թիմը սխալը սխալի հետևից է անում։ Փոխանակ սխալները գիտակցեն և շտկեն, իրավիճակը մեղմեն երկխոսությունով, փորձեն այդպես կայունացնել լարվածությունը երկրում, հակառակը՝ պետության հիմքերը խարխլող քայլեր են անում։