ԱՄՆ Ներկայացուցիչների պալատը որոշեց Դոնալդ Թրամփին իմփիչմենթի ենթարկել

Քիչ առաջ ԱՄՆ Ներկայացուցիչների պալատը  ձայների մեծամասնությամբ ընդունեց երկրի գործող նախագահ Դոնալդ Թրամփին պաշտոնանկ անելու վերաբերյալ դեմոկրատների ներկայացրած բանաձևը: Այս որոշումը Թրամփին դարձնում է ԱՄՆ պատմության մեջ առաջին նախագահը, որին Պալատը երկու անգամ իմպիչմենթ է հայտարարել: 2019-ի դեկտեմբերին Ներկայացուցիչների պալատը կողմ քվեարկեց համապատասխան բանաձևին՝ նրան մեղադրելով լիազորությունները չարաշահելու մեջ, բայց Սենատը մերժեց այն: Ինչպես հայտնում է CNN-ը՝ հունվարի 13-ին ԱՄՆ Ներկայացուցիչների պալատն ընդունեց Թրամփին պաշտոնանկ անելու բանաձևը  232 կողմ և 197 դեմ ձայների հարաբերակցությամբ:

Առաջարկված բանաձևով Թրամփին մեղադրանք է առաջադրվում «ապստամբության հրահրում»՝ հունվարի 6-ին Վաշինգտոնում անկարգությունները հրահրելու մեջ, երբ կոնգրեսականները հաստատեցին նախագահական ընտրությունների արդյունքը: Արդյունքում, Թրամփի կողմնակիցները ներխուժեցին Կապիտոլիում:  

Ավելի վաղ Փոխնախագահ Մայք Փենսը հանդիպում էր ունեցել Թրամփի հետ, այնուհետև մերժել էր կիրառել Սահմանադրության 25-րդ հավելումն ուժի մեջ մտցնելու դեմոկրատների կոչը: Հիշեցնենք, որ այդ կետը Փենսին թույլ է տալիս Թրամփին նախագահի պաշտոնում ճանաչել անգործունակ ու նրան հեռացնել պաշտոնից: 

Իմփիչմենթի հարցն այժմ տեղափոխվելու է Սենատ, որտեղ արդեն դատավարության գործընթացը կարող է ավարտվել Թրամփի նախագահության ժամկետի լրանալուց՝ հունվարի 20-ից ավելի ուշ: Սակայն այստեղ կարեւորը ժամանակը չէ, այլ փաստը, ասում են դեմոկրատները: Անկախ ժամկետից, իմփիչմենթի ենթարկվելուց հետո Թրամփն այլեւս երբեք չի կարող դառնալ նախագահի թեկնածու: 

Սենատում հանրապետականների առաջնորդները քննարկում են իմպիչմենթի հարցն արդեն այս ուրբաթ՝ հունվարի 15-ին վարույթ ընդունելու հնարավորությունը: Ավելի վաղ Սենատի մեծամասնության ղեկավար Միթչ Մաքքոնելը հայտարարել էր, որ չի կարող արտահերթ աշխատանքային նիստ նշանակել առանց բոլոր 100 սենատորների համաձայնության, իսկ հաջորդ հերթական նիստը նախատեսված է միայն հաջորդ երեքշաբթի օրը: