կարևոր
1869 դիտում, 1 տարի առաջ - 2020-12-28 21:36

Կոչ ենք անում ուժային կառույցներին՝ չդառնալ հայրենիքը դավաճանած ռեժիմի գերին. Հայրենիքի փրկության շարժում

Հայրենիքի փրկության շարժման խորհուրդը հայտարարությամբ է հանդես եկել, որում մասնավորապես ասվում է, որ քաղաքական հոգեվարքի մեջ գտնվող իշխանությունն անցել է բռնաճնշումների գործադրման նոր մեթոդների: Շարժման խորհուրդը վերահաստատելով  հայրենիքի փրկության գործում իր վճռականությունը կրկին կոչ է անում ՀՀ ոստիկանությանն ու ուժային մյուս կառույցներին՝ չդառնալ հայրեինիքը դավաճանած ռեժիմի գերին:  

ՀԱՅՏԱՐԱՐՈՒԹՅՈՒՆ

Ակնհայտ է, որ քաղաքական հոգեվարքի մեջ գտնվող իշխանությունն անցել է բռնաճնշումների գործադրման նոր մեթոդների:

Քաղաքական ենթատեքստ պարունակող բազմաթիվ քրեական գործեր հարուցելու պատվերներին զուգընթաց, այսօր արդեն գործի դրվեց պատգամավորական մանդատի ուժով իրենց անձեռնմխելի համարող իմքայլական առանձին պատգամավորների սանձարձակ, քաղաքացիներին կոպիտ վիրովորող, սադրիչ և բռնություն կամ դրա սպառնալիքների գործադրում ենթադրող վարքագիծ:

Առավել դատապարտելի է ոստիկանության պահվածքը, որը սանձարձակ պատգամավորների նկատմամբ օրենքով նախատեսված հարկադրանքի միջոցներ կիրառելու փոխարեն՝ ապօրինի կերպով, բռնի ուժի գործադրմամբ խափանեց քաղաքացիների խաղաղ ակցիաները, բերման ենթարկելով և անազատության մեջ պահելով բազմաթիվ արժանապատիվ քաղաքացիների, ովքեր չեն հադնուրժում հայրենիքի դավաճանությունը: Հանցագործության առերևույթ հատկանիշներ պարունակող գործողություններով այսօր բերման են ենթարկվել և շուրջ երեք ժամ անազատության մեջ պահվել 31 անձ, իսկ ՀՅԴ գերագույն մարմնի անդամ Աշոտ Սիմոնյանին Արաբկիրի ոստիկանության մոտ առևանգել և ձերբակալել են:

Սա ոչ այլ ինչ է, քան իրավական պետությունը խափանելու, ակնհայտ հոգեկան խնդիրներ ունեցող անձի իշխանությունը բռնաճնշումներով հաստատելու անհաջող փորձ:

Հայրենիքի փրկության շարժումը և փաստաբանների թիմն արդեն նախաձեռնել են անհրաժեշտ և հրատապ իրավական գործընթացներ՝ իրավախախտում թույլ տված ԱԺ պատգամավոր Սիսակ Գաբրիելյանին, ինչպես նաև ոստիկանության մի շարք ծառայողներին քրեական պատասխանատվության ենթարկելու ուղղությամբ:

Մենք վերահաստատում ենք հայրենիքի փրկության գործում մեր վճռականությունը: Դավաճանը օր առաջ պետք է հեռանա։

Կրկին կոչ ենք անում ՀՀ ոստիկանությանն ու ուժային մյուս կառույցներին՝ չդառնալ հայրեինիքը դավաճանած ռեժիմի գերին:

Հայրենիքի փրկության շարժման խորհուրդ

28.12. 2020 թ․