կարևոր
1316 դիտում, 6 ամիս առաջ - 2020-12-05 17:17

Փաշինյանը փորձելու է նոր արտահերթ ընտրություններ կազմակերպել, կեղծելով դրանք, Նիկոլը պետք է հեռանա և վերջ. Իշխան Սաղաթելյան (ՏԵՍԱՆՅՈւԹ)

Ընդդիմությունը 2 օր առաջ որոշեց ստեղծել վերկուսակցական, համահայկական շարժում՝ «Հայրենիքի փրկության շարժում», որի գլխավոր նպատակն է՝ փրկել հայրենիքը և հեռացնել Նիկոլին: Ազատության հրապարակում Նիկոլ Փաշինյանի հրաժարականի պահանջով հանրահավաքի ժամանակ հայտարարեց ՀՅԴ ԳՄ ներկայացուցիչ Իշխան Սաղաթելյանը:

«Եթե մենք Նիկոլ Փաշինյանին հեռացրած լինեինք վեց ամիս առաջ, պատերազմ չէր լինելու, եթե նրան հեռացնեինք պատերազմի սկզբին, այդ պատերազմը մեզ համար ավարտվելու էր հաղթանակով, եթե մենք Նիկոլին հեռացնեինք ստորացուցիչ պայմանագիրը ստորագրելու օրը, մենք այսօր ունենալու էինք շատ ավելի լավ իրավիճակ, հետևաբար Նիկոլի՝ մեկ օր ավել մնալը փորձանք է մեր պետության և հայրենիքի համար»,- հայտարարեց նա:

Իսկ թե ինչ հարց են լուծվում Փաշինյանի հեռացումով, նա նշեց՝ առաջինը հնարավորություն կստեղծվի Հայաստանում հաստատել կայունություն և համերաշխություն: «Նիկոլի հեռացումով հնարավորություն է ստեղծվում պաշտպանել մեր երկիրը, մեր ժողովրդի ու պետականության շահերը, թուրքի առջև ծնկած, թուրքին հանձնված ղեկավարը չի կարող պաշտպանել մեր ժողովրդի շահերը, Նիկոլ Փաշինյանի հեռացումով մենք կկանխենք սպասվող սոցիալ-տնտեսական կոլապսը և հումանիտար աղետը, Նիկոլ Փաշինյանի հեռացումով հնարավորություն կստեղծվի մեր երկրում իրականացնել, ազատ, արդար ընտրություններ»,- շեշտեց նա:

Սաղաթելյանի խոսքով՝ իրավիճակից դուրս գալու համար Նիկոլ Փաշինյանը փորձ է անելու արտահերթ խորհրդարանական ընտրություններ կազմակերպել: «Այդ ընտրությունների ժամանակ փորձ է անելու մնալ վարչապետի աթոռին, կեղծել ընտրությունները և վերարտադրվել, եկեք մենք հենց հիմա հայտարարենք՝ մենք որևէ տարբերակ չենք ընդունելու, կա մեկ ճանապարհ և մեկ ընտրություն՝ Նիկոլը պետք է հեռանա և վերջ»,- նշեց նա: