436 դիտում, 2020.12.05 17:08

Աթոռը զբաղեցնող մարդը քաղաքականապես մահացել է և այլևս երբեք կյանքի նշույլներ չի կարողանա ցույց տալ․ Արթուր Վանեցյան (ՏԵՍԱՆՅՈւԹ)

Մենք միասին, բոլոր կարող ուժերով, կձևավորենք այնպիսի իշխանություն, որը կկայացնի ոչ թե պարտադրած, այլ այլընտրանքների վրա հիմնված որոշումներ, այսօր հանրահավաքի ժամանակ ասաց «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը:

«Հետևաբար եկեք արձանագրենք. Նիկո՛լ ,դու այլևս իշխանություն չունես: Հենց այլընտրանքից զուրկ որոշումների պատճառով Հայաստանն այսօր ջլատված է: Մենք այսօր չունենք աշխարհում վստահություն վայելող իշխանություն, քանի որ սեփական պետությունը կապիտուլյացիայի հասցրած իշխանությունը չի կարող հարգանքի արժանանալ այլ պետություններում: Մեր խնդիրն է վերականգնել պետության ներքին դիմադրողականությունը», - ասաց Վանեցյանը:

Նրա խոսքով՝ պատերազմում տարած մեր պարտության հիմնական պատճառներից մեկը Ռուսաստանի հետ հարաբերությունների խայտառակ վիճակն է՝ չնայած որ Նիկոլ Փաշինյանն, առանց բացառության, փչացրել է Հայաստանի հարաբերությունները բոլոր աշխարհաքաղաքական կենտրոնների հետ:

«Նրան լուրջ չեն ընդունել Ռուսաստանում, Եվրոպայում, ԱՄՆ-ում, Չինաստանում, Իրանում ու արաբական աշխարհում: Փաշինյանը վարել է Հայաստանն արտաքին աշխարհից մեկուսացնեու քաղաքականություն, ինչի արդյունքում միջազգային հարաբերությունների սուբյեկտից վերածվել ենք օբյեկտի: ՀՀ ղեկավարը չի համարձակվում պատասխանել Ալիևին և Էրդողանին, այն դեպքում, երբ նրանք խոսում են Հայաստանի տարածքով կառուցվող ճանապարհի մասին», - ասաց Վանեցյանը:

Ըստ Վանեցյանի աթոռը զբաղեցնող մարդը քաղաքականապես մահացել է և այլևս երբեք կյանքի նշույլներ չի կարողանա ցույց տալ։ Հայաստանի վարչապետի աթոռին պինդ փաթաթված մարմինը պարզապես քաղաքական դիակ է։ Նա պարզապես մի ֆեյք է, պետության քանդման ու նաև պատերազմում պարտության գործում մեծագույն դեր է ունեցել և դեռ շարունակում է ունենալ կեղծ իրականությունը։