կարևոր
2497 դիտում, 2 տարի առաջ - 2020-11-17 19:10

Մոսկվան կներդնի բոլոր ջանքերը՝ Լեռնային Ղարաբաղի մասին եռակողմ հայտարարության վերանայում թույլ չտալու համար. Լավրով

Մոսկվան կներդնի բոլոր ջանքերը՝ Լեռնային Ղարաբաղի մասին եռակողմ հայտարարության վերանայում թույլ չտալու համար. Լավրով

Մոսկվան կներդնի բոլոր ջանքերը՝ Լեռնային Ղարաբաղի մասին եռակողմ հայտարարության վերանայում թույլ չտալու համար: «Մենք հիմա չենք տեսնում այդ հայտարարությունը վերախմբագրելու, վերանայման ենթարկելու որեւէ փորձ: Ամեն ինչ կանենք, որ նման փորձեր չլինեն ու ամեն դեպքում հաջողությամբ չպսակվեն»,- ասել է արտգործնախարար Սերգեյ Լավրովը:

Նա նաեւ անդրադարձել է ամերիկյան պետքարտուղարության բարձրաստիճան ներկայացուցչի այն հայտարարությանը, թե մնում են շատ հարցեր, որոնք ռուսական կողմը պետք է պարզաբանի, ինչպես, օրինակ, համաձայնության պարամետրերը՝ ներառյալ Թուրքիայի դերը: «Ինձ համար տարօրինակ էր դա լսել: Եթե անկեղծ, ես կարծում եմ, որ նման հայտարարությունները կա՛մ արտացոլում են նման հայտարարություններ կատարողի ոչ բավարար տեղեկացվածությունը, կա՛մ պարզապես թյուրիմացությունների արդյունք են»,- ասել է Լավրովը:

Նա հավաստիացրել է, որ ամերիկյան կողմը ամեն ինչի մասին տեղեկացվել է պետքարտուղարի տեղակալի մակարդակով՝ հաշվի առնելով, որ Մայք Փոմփեոն այժմ գտնվում է երկարաժամկետ արտասահմանյան ուղեւորության մեջ:

Ռուսաստանի նախագահի մամուլի քարտուղար Դմիտրի Պեսկովն ավելի մեղմ է արտահայտվել: Նա ասել է՝ եթե ԵԱՀԿ-ի Մինսկի խմբի համանախագահ երկրներ ԱՄՆ-ին եւ Ֆրանսիային որեւիցե պարզաբանում պետք լինի Թուրքիայի եւ Ղարաբաղի վերաբերյալ, նրանք դրանք կստանան: