կարևոր
1199 դիտում, 1 տարի առաջ - 2020-11-09 18:48

Մերկելը նշել է ԱՄՆ-ի կարեւոր դերը աշխարհում ազատության ու խաղաղության համար

Մերկելը նշել է ԱՄՆ-ի կարեւոր դերը աշխարհում ազատության ու խաղաղության համար

Գերմանիայի կանցլեր Անգելա Մերկելը շնորհավորել է Ջո Բայդենին ԱՄՆ-ի նախագահի պաշտոնում ընտրվելու կապակցությամբ։

«Մենք՝ գերմանացիներս, վերապրել եւ փորձով իմացել ենք, թե ինչ կարեւոր դեր է ԱՄՆ-ը խաղում աշխարհում ազատության ու խաղաղության համար: Մենք անմիջականորեն վերապրել եւ փորձով իմացել ենք, թե ինչ մեծ նշանակություն ունեն ամերիկա-գերամանական բարեկամությունը, անդրատլանտյան գործընկերությունը Գերմանիայի համար, Եվրոպայի ու աշխարհի համար»,- Մերկելը հայտարարել է լրագրողներին:

Նա նշել է, որ «յուրաքանչյուր չորս տարին մեկ ամբողջ աշխարհն առանձնահատուկ ուշադրությամբ է հետեւում ԱՄՆ-ի ընտրություններին»:

«Ես սրտանց շնորհավորում եմ Ջո Բայդենին ԱՄՆ-ի 46-րդ նախագահ ընտրվելու կապակցությամբ: Ջո Բայդենն իր հետ բերում է ներքին ու արտաքին քաղաքականության բազմամյա փորձ: Նա լավ գիտի Գերմանիան եւ Եվրոպան: Ես հաճույքով եմ հիշում նրա հետ տեղի ունեցած հաճելի հանդիպումներն ու զրույցները»,-շարունակել է Մերկելը:

Գերմանիայի կանցլերը նաեւ շնորհավորել է Քամալա Հարիսին՝ փոխնախագահ ընտրվելու կապակցությամբ՝ նրան համարելով «Ամերիկայի հնարավորությունների օրինակ»:

«Անհամբերությամբ սպասում եմ նրա հետ ծանոթանալուն»,-հավելել է Մերկելը: