կարևոր
1625 դիտում, 1 տարի առաջ - 2020-11-06 10:06

Երևան է հասել Ուկրաինայի հայերի միության հումանիտար օգնության նոր խմբաքանակը

Երևան է հասել Ուկրաինայի հայերի միության հումանիտար օգնության նոր խմբաքանակը

Ուկրաինայի հայերը շարունակում են հումանիտար օգնություն ցուցաբերել հայրենիքին: «AnalitikaUA.net»-ը տեղեկացնում է, որ նախօրեին Երևանում դիմավորել են 100 տոննա հումանիտար բեռով 5 բեռնատար՝ բերված Ուկրաինայից: Ուկրաինայի հայերի միության գործադիր տնօրեն Հովակիմ Հարությունյանը նշել է, որ ևս 40 տոննա հումանիտար օգնություն պատրաստվում է:

Արդեն հայրենիքին տրամադրված օգնության մեջ շտապօգնության մեքենաներ են, ռեանիմոբիլներ, գեներատորներ, բժշկական սարքավորումներ, սննդամթերք, հագուստ և այլն:

«Ուկրաինայի հայերի միության կողմից ավելի քան 2 հազար 500 մարդ ամեն օր ապահովվում է սննդով և անհրաժեշտ պարագաներով: Ավելի քան 100 ընտանիք ապահովվել է կացարանով»,-նշել է Հովակիմ Հարությունյանը:

Պատերազմի առաջին իսկ օրերից Կիևում և Երևանում աշխատում են Ուկրաինայի հայերի միության օպերատիվ շտաբերը, որոնք օգնություն են տրամադրում հայրենակիցներին:

Արցախի դեմ սեպտեմբերի 27-ից Ադրբեջանի` Թուրքիայի և վարձկան-ահաբեկիչների աջակցությամբ սանձազերծած ռազմական գործողությունների ընթացքում երեք անգամ` հոկտեմբերի 10-ին Ռուսաստանի, հոկտեմբերի 18-ին Ֆրանսիայի, հոկտեմբերի 26-ին ԱՄՆ-ի միջնորդությամբ հայտարարվել է հրադադարի մասին, սակայն ուժի մեջ մտնելուց րոպեներ անց Ադրբեջանը խախտել է դրանք, ձեռնարկել դիվերսիոն գրոհներ, հրետակոծել առաջնագիծն ու խաղաղ բնակավայրերը։ Աշխարհի տարբեր երկրներում հայ համայնքի ներկայացուցիչները մի շարք ակցիաներ ու ցույցեր են անցկացնում՝ տեղի իշխանություններից պահանջելով դատապարտել Արցախի դեմ սանձազերծված ագրեսիան ու ճանաչել Արցախի անկախությունը: Դրան զուգահեռ, տարբեր երկրներում հայերի կողմից մեծաքանակ հումանիտար օգնություն է հավաքագրվում, դրամահավաք կազմակերպվում Հայաստանին, Արցախին աջակցելու համար: