կարևոր
1104 դիտում, 8 ամիս առաջ - 2020-10-10 22:08

Արցախի նախագահը բարձր է գնահատել Հադրութում հակառակորդի դեմ կռվող զինծառայողների մարտական ոգին

Արցախի նախագահը բարձր է գնահատել Հադրութում հակառակորդի դեմ կռվող զինծառայողների մարտական ոգին

Արցախի նախագահը Արայիկ Հարությունյանը բարձր է գնահատել Հադրութում թշնամու դիվերսիոն ներթափանցման ուժերի դեմ պայքարող զինծառայողների մարտական ոգին: Հարությունյանը «Ֆեյսբուք»-ի իր էջում գրել է, որ նրանց խաղաղ ու սթափ հայացքները հաղթանակի վստահ տրամադրությունն են արտահայտում թշնամու հրոսակախմբերի դեմ պայքարում:

«Ի դեպ, տեղում պատահաբար հանդիպեցի նաև արցախյան առաջին պատերազմի մեր լեգենդար հրամանատարներից Առուշան Բադասյանին, ով պատերազմի լուրն առնելուն պես Միացյալ նահանգներից շտապել է Արցախ: Մենք մեր հողի համար ենք կանգնում, իսկ այդ ընթացքն անկասելի է: Փա՛ռք հայ ժողովրդին, որ հավերժ պետք է ապրի ու արարի իր հայրենի հողում»,- գրել է Հարությունյանը:

 

Արցախի Հանրապետության պաշտպանության նախարարությունը հայտնել էր, որ Ադրբեջանը դիվերսիոն-հետախուզական ներթափանցման փորձ է ձեռնարկել Հադրութի ուղղությամբ՝ նշելով, որ Պաշտպանության բանակը շարունակում է խմբի ոչնչացման գործողությունը:

«Նախքան հումանիտար հրադադարի հաստատումը ադրբեջանական կողմը դիվերսիոն-հետախուզական ներթափանցման փորձ է ձեռնարկել Հադրութի ուղղությամբ: Չնայած հրադադարի հաստատումից անցել է շուրջ 3 ժամ՝ ներթափանցած խմբի շրջափակման և ոչնչացման գործողությունները շարունակվում են: Ռազմաճակատի մյուս հատվածներում համեմատաբար հանգիստ է: Ադրբեջանական կողմի գործողությունները, ըստ երևույթին, թելադրված են Հադրութը գրավելու մասին Ադրբեջանի նախագահի նախօրեին կատարած հայտարարությունը ապացուցելու նպատակով»,-ասված էր Արցախի ՊՆ-ի տարածած հաղորդագրության մեջ:

Ավելի ուշ Արցախի Հանրապետության նախագահ Արայիկ Հարությունյանը հայտնել էր, որ իրավիճակը լրիվությամբ գտնվում է Պաշտպանության բանակի վերահսկողության տակ։