կարևոր
1108 դիտում, 1 տարի առաջ - 2020-10-10 20:27

Փորձելու ենք Վրաստանին անակնկալի բերել. Հենրիխ Մխիթարյան

Փորձելու ենք Վրաստանին անակնկալի բերել. Հենրիխ Մխիթարյան

Հայաստանի ֆուտբոլի ազգային թիմի ավագ Հենրիխ Մխիթարյանի կարծիքով հավաքականն Ազգերի լիգայի որակավորման երրորդ տուրում կփորձի անակնկալի բերել վրացիներին:

Նախախաղային ասուլիսի ժամանակ Մխիթարյանը խոսել է հավաքականի շարքերը նոր համալրած Վահան Բիչախչյանի մասին` շեշտելով. «Առաջին անգամ եմ նրա հետ մարզվում: Լավ տպավորություն է թողել, տաղանդավոր ֆուտբոլիստ է: Հուսով եմ, որ իր վրա ավելի շատ կաշխատի: Զգացնել է տալիս, որ բուռն ցանկություն ունի լավ խաղալու: Ասել եմ, որ կանգ չառնի ձեռքբերածով»:

Խոսելով հավաքական հրավիրված 10 նոր ֆուտբոլիստների մասին` Մխիթարյանը շեշտեց, որ նրանք, ովքեր այսօր ներկա են հավաքին, փորձելու են իրենց ներդրումն ունենալ հաղթանակի հասնելու գործում:

«Մեզնից ինչ կախվածն անելու ենք, որ բարելավենք մրցաշարային աղյուսակում մեր դիրքը:  Հենց առաջին օրից էլ շատ բան ենք սովորել պարոն Կապառոսից: Նա շատ լավ և ուժեղ մասնագետ է, որն արդեն ապացուցել է դա: Հաճելի մարզումներ ենք անցկացնում և հույս ունեմ, որ Կապառոսը մեծ օգուտ կտա հավաքականին»,-ասել է կիսապատշպանը:

Անդրադառնալով առաջիկա մրցակցին` Վրաստանի ընտրանուն, Մխիթարյանը փաստեց, որ մրցակցին լավ վերլուծել են և ծանոթ են նրանց: «Վերջին մի քանի հանդիպումներում Վրաստանի ընտրանին լավ է հանդես եկել, բայց դա ոչինչ չի նշանակում: Փորձելու ենք Վրաստանին անակնկալի բերել` խաղալ մեր խաղը և հաջողության հասնել»,-եզրափակեց Մխիթարյանը:

Ավելի վաղ հայտնի էր դարձել, որ Ազգերի լիգայի հոկտեմբերի 11-ին նախատեսված Հայաստան-Վրաստան հանդիպման վայրը փոխվել է ՈՒԵՖԱ-ի նախաձեռնությամբ: Հանդիպումը կկայանա նույն օրը Լեհաստանի Տիխի քաղաքում։ Ինչպես և Հայաստան-Ալբանիա հանդիպման դեպքում, ՈՒԵՖԱ-ն որոշումը կայացրել է՝ հաշվի առնելով տարածաշրջանում ստեղծված իրավիճակը: Հայաստանի ֆուտբոլի ֆեդերացիան վերջին օրերի բանակցությունների ընթացքում վերահաստատել է ՀՀ կառավարության պատրաստակամությունը հանդիպումն անցկացնել Երևանում։

Նշենք, որ Հայաստանի իշխանությունները դեռևս նախորդ շաբաթ անվտանգության երաշխիքները հավաստող պաշտոնական գրություն էին տրամադրել ՈՒԵՖԱ-ի ղեկավարությանը։ ՀՖՖ-ն, իր հերթին, պնդել է, որ պատրաստ է Հայաստան-Վրաստան հանդիպումն անցկացնել սեփական հարկի տակ՝ հաշվի առնելով տրված երաշխիքները, սակայն ՈՒԵՖԱ-ն այլ որոշում է կայացրել։ Հանդիպումը կանցկացվի առանց հանդիսատեսների։ Հոկտեմբերի 14-ին Ազգերի լիգայի շրջանակում Հայաստանի հավաքականը Տալինում կմրցի Էստոնիայի ընտրանու հետ։